Super Suroy: Tinubdan Falls, kabilin sa Catmon

KON maghisgot gani ta og wa­terfalls, bulahan ug abun­da ang isla sa Sugbo niini.

Gani, ang ubang mga busay kay commercialized na ug gi­­dagsaan sa mga turista, apan duna pay pipila nga nagpabilin nga wa pa matandog sa sobrang negosyo.

Usa na niini ang Tinubdan Falls, ang natural nga atraksyon nga gipasigarbo sa lungsod sa Catmon, amihanang Sugbo.

Naa kini mahimutang sa bu­­kirang barangay sa Tabili, gibanabanang 13 kilometros ang gilay-on gikan sa lungsod proper.

Nganong gitawag og Tinubdan?

Ang tinubdan maoy Bini­sa­ya sa English nga pulong nga “source.”

Sumala ni Tabili Barangay Konsehal ug kanhi kapitan Rogelio Pontillas, ang tubig sa busay gikan sa tinubdan nga diha niagi sa kilid sa pangpang.

Matod niya nga sigon sa estorya sa katiguwangan sa ilang lugar, ang busay gi-develop sa mga sundawong Amerikano aron magsilbi nga tinubdan sa kuryente alang sa ilang kampo sa Agsuwao, Catmon niadtong ikaduhang gubat sa kalibutan.

Duha ka option ang imong pilian aron maabot ang waterfalls: Una, ang magbaktas agi sa sapa paingon sa kinapusuran. Ikaduha, magbaklay agi sa yuta nga gibanabanang 300 metros gikan sa registration area sa Barangay Tabili.

Kon mosubay ka sa sapa, kinahanglan mag-amping ka sa pagtunob sa dagkong mga bato kay ang uban niini dangugon ug gilumotan nga delikado nga madakin-as ka.

Kon magbaktas ka sa yuta, sa unang paglakaw moagi ka og patag, diin may gipangtanom nga mga mais ug kamote, may bahin nga kasagbutan dayon agi sa gamay nga kakahoyan.

Kinahanglan usab ka mag-­amping kay may bahin nga bakilid ang dalan nga subayon nga kuyaw kon ikaw madakin-as labi na kon mag-uwan ug lapukon.

Wa pay 10 minutos (mag-agad sa gipaspason sa inyong paglakaw), madungog na nimo ang tinagaktak sa tubig sa Tinubdan Falls.

Inig abot nimo sa lugar, ma­wagtang ang imong kakapoy ug mogaan ang imong pamati.

Dunay unom ka waterfalls o agianan sa tubig nga naporma diin ang tubig mangatagak sa duha ka catch basins. Ang unang basin sa tunga kay gibanabanang may gilawmon nga unom ka tiil samtang ang ikaduha, nga naa sa ubos, may gibanabanang gilawmon nga duha ngadto sa tulo ka tiil.

Di sama sa ubang falls nga dunay magunitan nga pisi ang mga tawo, sa Tinubdan Falls, ikaw mismo sa imong kaugalingon ang mag-amping ug di mokompiyansa sa mga dagkong mga bato palibot sa falls kay dangog ug kuyaw ka nga ma-slide paingon sa ubos.

Katingalahan nga lugar

Si Johann Patrick Jusay, 27, nag-guide sa Superbalita Cebu, nisaysay nga kaniadto giingong dunay madungog nga busina sa barko sa busay panahon sa kagabhion.

Siya nidugang duna usab mga istorya nga kaniadto du­nay nakit-an nga mga babaye nga nagsul-ob og tag-as nga mga senina nga naglingkod sa mga sanga sa balete.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph