DILI una maka-supply og bugas ang National Food Authority (NFA) 7 sa Cebu Provincial Detention and Rehabilitation Center (CPDRC) ug sa uban pang jail facilities tungod sa limitado na nila nga suplay.
Ang NFA rice supply sa CPDRC kutob na lang ugmang adlawa apan gipasalig sa tagdumala nga dili magutman ang mga piniriso.
Kutob na lang karong adlawa ang supply sa NFA rice sa CPDRC. Ang prisohan mokonsumo og 1,500 kilos o 30 ka sako sa bugas matag adlaw alang sa 3,691 ka mga piniriso.
Plano sa CPDRC nga mag-request na usab ug gatosan ka sako sa NFA rice gikan sa ahensiya apan posible ra gihapon kining mabalibaran.
Matod sa tigpamaba sa NFA 7 Olma Bayno, giundangan na sa ilang ahensiya ug pag-supply og NFA rice ang mga retailer ingun man ang mga prisohan, nga nagsalig niini. Gani gibalibaran na nila ang request sa BJMP-Minglanilla alang sa suplay sa bugas.
Gipasabot ni Bayno nga ang nahibiling suplay sa NFA rice sa ilang ahensiya, gitagana na nila alang sa posibleng kalamidad ug relief operations.
“Naa mi order of priority sa among inventory. Gi-reserve na lang namo para sa mga relief (operation),” niingon si Bayno.
Gipaniguro hinuon sa CPDRC nga dili magutman ang mga piniriso niining gikataho kar nga shortage sa suplay sa NFA rice.
Matod ni Acting Warden Bobby Legaspi, dunay suplay sa bugas ang Provincial Social Welfare and Development Office ug ang buhatan ni Bise Gob. Agnes Magpale ug mahimo silang makahuwam aron ikonsumo sa mga piniriso.
“We have other resources that we can borrow from- PSWDO and Vice Gov’s Office,” sumala ni Legaspi.
Nasayran nga ang matag inmate sa CPDRC gigahinan ug P60 alang sa ilang pagkaon, diin nalakip na ang 400 grams sa rice matag adlaw.
Ang NFA Coucil nipaniguro hinuon nga maabot na ang ilang gi-import nga dugang bugas nga anaa sa 325,000 metric tons sa tapos ning buwana.
Ahwag lang sa ahensiya sa publiko nga daginuton ang nahibilin nila nga NFA rice ug dili mag-usik-usik niini. (AZDL)