DILI mauwanan ug dili mainitan.
Mao kini ang tumong karon sa Cebu City Transportation Office (CCTO) sa pakig-alayon nila sa Big Foot Company nga gamiton sa kagamhanan sa dakbayan sa Sugbo ang luna niini sa South Road Properties (SRP) aron butangan sa na-impound nga mga sakyanan.
Samtang sukad gipatuman ang 30 ka adlaw nga pag-impound sa mga sakyanan nga molapas sa no counterflow sa kadalanan sa dakbayan sa Sugbo, mas niminus ang nilapas o ni-counterflow.
Matod sa operations head sa CCTO Francisco “Isko” Ouano nga sukad sa pag-implementar nila sa executive order no. 34, miabot na sa 50 porsyento ang pagminus sa mga motorista nga kusog nga mo-counterflow.
Tungod kay pipila sa mga reklamo sa mga tag-iya sa motorsiklo ug sakyanan nga ma-impound sa CCTO nga basin og maguba ang ilang sakyanan tungod kay mauwanan ug mainitan, nakig-alayon sila sa usa ka film company aron mogamit sa ilang lugar ug didto ibutang ang mga impounded motor vehicles.
Ang luna dunay gidak-on nga 1.5 ka ektarya ug di mainitan ang mga sakyanan tungod kay dunay atop.
Kon mohatag na og signal ang kompaniya, ilang ibalhin ang tanang na-impound nga mga motorsiklo ug sakyanan.
Giklaro usab ni Ouano nga pwede ra makuha sa mga tag-iya sa sakyanan ug motorsiklo ang ilang mga gamit ingon man battery kon di pa mabutang sulod sa impounding area apan kon madala kini didto, di na kini mahimo pang hilabtan.
Ang 30 ka adlaw nga pag-impound sa mga sakyanan ug motorsiklo nga madakpan kay nag-counter flow gihulagway sa pipila nga sobra ra, apan si Ouano miasoy nga si Mayor Tomas Osmeña maoy nagbuot ani ug igo lang sila nagpatuman sa mando nga ang tumong para pag-disiplina ug pagluwas og daghang kinabuhi.
Gipahibaw usab niya nga bisan og Sabado ug Dominggo manakop gihapon ang CCTO sa mo-counter flow.
Gikan sa unang adlaw nga pagpatuman sa mando hangtod kagahapon, miabot na sa 172 ka mga motorsiklo, 12 ka private cars, upat ka public utility jeepney ug duha ka mga taxi ang na-impound.
Nasayran nga nagplano sab ang CCTO nga mopalit og 30 ngadto na sa 50 ka mga body cam alang sa kaluwasan sab sa ilang mga traffic enforcer ug aron sab ma-record ang mga panghitabo ilabi na kun duna sila’y madakpan.
Gihulagway ni Ouano nga makatabang ang body cam sa mga traffic enforcers sanglit ma-record tanang buhaton.