DILI tugotan sa Land Transportation Franchising and Regulatory Board nga mapaubos sa calibration ug sealing o resealing ang mga taxi unit kon way gadgets sama sa dashboard camera ug mobile applications.
Sa giisyu nga Memorandum Circular 2018-001 ni LTFRB 7 Director Ahmed Cuizon kagahapon bahin sa mga lagda alang sa calibration ug sealing o resealing sa taximeters, kini nimando nga kinahanglan duna nay dashboard camera, Global Navigation Satellite System (GNSS) receiver, libre nga wi-fi, ug closed-circuit television (CCTV) cameras ang mga taxi unit.
Ang mga operator og taxi sa Sugbo way supak niini, sumala ni Richard Cabucos, presidente sa Metro Cebu Taxi Operators Association (MCTOA).
“Mo-comply ta ana. Wa tay mahimo kay pabutangan man nila para sa modernization program na, para makakuha sad mi sa bag-ong fare rate,” sumala ni Cabucos sa pakighinabi sa Superbalita Cebu.
Matod ni Cuizon, kon naay usa nga kuwang niini, dili ma-calibrate ang usa ka taxi unit.
Ang calibration, sealing o resealing sa mga metrohan sa taxi gikinahanglan aron masingil sa mga drayber og taxi ang bag-ong pletihan nga giumentohan.
Sa desisyon sa board sa LTFRB niadtong Oktubre 4, ang mga taxi nga nagserbisyo sa Metro Manila, mga probinsya, gawas lang sa Cordillera Administrative Region, permanente na ang P40 nga flag down rate.
Sa bag-ong pletihan, mahimo nang P13.50 ang pleti sa matag kilometro nga biyahe gikan sa kasamtangan nga P3.50 sa matag 300 metros, samtang mahimo nang P2 matag minuto ang waiting time gikan sa kasamtangan nga P3.50 sa matag dos minutos.
Karong Pebrero 19, 2018 hangtod sa Marso 12, 2018, sugdan na ang calibration ug sealing o resealing sa mga metro sa mga taxi unit sa South Road Properties kansang mga plate number nagtapos sa 2 ug 7; 3 ug 8 sa Marso 13, 2018 hangtod sa Abril 2, 2018; 4 ug 9 sa Abril 3, 2018 hangtod sa Abril 23, 2018; 5 ug 0 sa Abril 24, 2018 hangtod sa Mayo 14, 2018 ug 1 ug 6 sa Mayo 15, 2018 hangtod sa Hunyo 4, 2018.
Sa memorandum, ang mga operator og taxi kinahanglan mobayad og P510 sa matag case number alang sa giumentohan nga pletihan; P 10 sa matag case number isip legal research fee; P500 matag unit alang sa testing ug sealing o resealing; P50 sa matag unit alang sa inspection fee ug P40 sa matag unit alang sa verification fee.
Dunay penalty nga P200 sa matag adlaw nga pagkalangay alang sa uwahi nga calibration ug sealing o resealing.
Alang sa CCTV ug dashboard camera, ang mga operator mahimo mogamit og dual camera equipment nga dunay continuous recording sud sa 24 oras.
Si Cuizon niingon sa orihinal nga lagda kay 72 ka oras ang recording sa dashboard camera, apan nisugot ang board nga sud na sa 24 oras ang recording niini apan ang angay buhaton sa drayber dad-on ang dashboard camera sa buhatan sa operator ug ipa-save sa computer ang recording sud sa 30 ka adlaw.