PIPILA ka adlaw na lang, Pebrero 14 na, ang adlaw nga gihuwat pag-ayo sa mga tawo nga naghinobra ang pagbati.
Naghinobra tungod kay eksayted kaayo ang pipila, labi na ang mga batan-on nga dunay uyab, kay alang nila, kining adlawa mas bug-at nila nga mapabati sa usa'g usa ang gugma.
Pero kung hunahunaon, tanang adlaw baya Valentine's Day, labi na kung di kita magtanum og pagdumot sa atong mga nakaaway, labi na kung luyo sa mga problema naa ang tiunay nga pagpahiyom, di lamang sa atong mga minahal kondi ang paghiayon ug pagtamod sa mga butang sa palibot.
Sa pagsulod sa unang adlaw sa bulan sa Pebrero, di malikayan sa pipila nga mahinumdom gayod sa ilang kanhi tam-is nga kagahapon sa gugma, ug dunay pipila nga mas pilion pa nila nga walay ka-date ning panahon, kaysa subli pa nga masakitan.
Pero naa sab nagtuo sa giingong "second chance", mihatag sa ikaduhang higayon sa iyang kanhi, nga gikan sa ilang panagbulag, subling nanalingsing sa pagbati ang ilang tagsa ka mga kasingkasing.
Naa say wa na gyod mituo'g second chance kay nasayod na silang daan sa batasan sa ilang kanhi na-uyab, nga maoy hinungdan nga karong Valentine's Day, mas ganahan pa sila mosuot og itom kaysa pula.
Diha koy higala, nangutana siya nako kung unsa daw akong suoton sa Valentine's Day, mitubag ko niya nga mag-itom ko, mikatawa siya, ug nangutana nga ngano daw?
Gipasabot nako siya nga kung mag-itom ko, wa kini nagpasabot nga wa pa ko kadawat sa akong kanhi nabungkag nga relasyon, mas pinasahe ang itom sa Valentine's Day kay kini ra ang nalahi ugaling masagol sa panon sa mga nag-date, hahahaha.
Pero hinumdomi baya nga tanang adlaw, -- gugma, gumikan kung walay gugma, seguro di mahuman ang imong gitrabaho sa matag-adlaw, kay lisod kaayo motrabaho kung wala ang gugma, way mahimong maayong resulta.
Basta, gitiman-an sab nako ang giingon sa mga tawo nga di kadawat sa ilang panagbulag nga, "walay forever, magbulag gihapon mo," hahahaha, bitaw oy, tinuod gayod kini.
Ang forever makita didto sa lubnganan, kung kamong duha itapad na ang mga lubong, ug makita sab ang forever ngadto sa gugma sa atong pamilya ingon man ang gugma sa pagtuo sa Diyos, -- kana ang tinuod nga forever, -- ang tinuod nga gugma ngari sa kalibutan.
Karong Valentine's Day, unta madungagan ang pagpanalingsing sa atong pagbati, di lamang sa atong mga uyab kondi ang gugma sab ngadto sa mga butang sa palibot nga gigasa sa Kahitas-an.