DIGOS CITY - Daghan na sa siyudad ang nagpareserba og nindot nga mga bouquet sa bulak alang sa mga minahal sa kinabuhi sanglit unom ka adlaw na lang saulogon na ang Valentine's Day.
Naandan nang himuon ang paghatag og mga bulak ug tsokalate sa ilang mga kapikas sa kinabuhi, trato, ginikanan ug suod nga higala sa maong adlaw.
Apan karon pa lang nag-abiso na ang mga manindahay og bulak sa merkado nga adunay pagsaka sa presyo niini sugod ugmang adlawa.
Anaa pa sa P300-P500 ang matag dosena sa rosas nga nag-depende sa klase apan gilaumang mahimo na kining P700-P1,000 pag-abot sa espesyal nga adlaw.
Si Rachell Largo nga tindera sa bulak nagbutyag nga anaa pa sa P300 ang matag bouquet sa bulak apan gilaumang mahimo kining P500 karong sunod semana.
Nasayran nga ang pinakamahal nga bulak mao ang kombinasyon sa Stargazer ug Rosas nga anaa sa P1,000 ang matag bouquet. Ang bulak nga Gerbera nga gisagulan sa ubang buwak mosaka sab sa P1,200 pataas.
Gipasabot sa mga manindahay nga normal lang ang pagsaka sa presyo sa bulak tungod kay magnihit ang suplay niini.
Gikan sa Barangay Kapatagan ang suplay sa mga bulak sa probinsiya apan sa maong okasyon gitakdang moangkat ang mga negusyante og mga bulak gikan sa silingang dapit sama sa Malagos sa Davao City, Bukidnon, General Santos ug Makilala, North Cotabato.
Gipasabot sab nila ang kahulogan sa matag kolor sa bulak sama sa pulang rosas nga simbolo sa respeto ug paghigugma, ang puting rosas sa kaputli, pagdayeg ang pink nga rosas, panaghigala alang sa yellow nga rosas, orange nga Rosas alang sa tinguha, peach nga rosas alang sa pagka-sinsero ug ang lavender sa love at first sight.
Alang sa tinun-ang si John Claros, 21, dili man nindot o mahal nga bulak ang mapalit tungod sa pagsaka sa presyo sa nag-unang palaliton, angayang ipakita sa managhigugmaay ang ilang sinseridad ug respeto sa matag usa.
Di sab siya motoo nga way "forever" sanglit mag-depende kini sa pagdala sa usa karelasyon.
"Kon siya o kamo gyud ang gipili ni God, kamo gyud hangtud sa kahangturan. Pagpalayo sa tentasyon ug tinuod nga gugma, dili uwag lang maoy maghatag ninyo sa maluntarong pamuyo," niya pa.