MAGUINDANAO PROVINCE - Giunhan sa militar ang planong pag-atake sa mga miyembro sa Bangsamoro Islamic Freedom Fighters sa usa ka detachment sa Citizen Armed Forces Geographical Unit (Cafgu) alas 9:30 sa buntag niadtong Miyerkules.
Nasayran gikan kang Philippine Army's 33rd Infantry Battalion commander Lt. Colonel Harold Cabunoc, nga nakadawat sila og taho nga plano nga atakihon sa grupo ni Kumander Datu Dima Maliba ang detachment sa Cafgu didto sa utlanan sa SK Pindatun, Maguindanao Province ug President Quirino, Sultan Kudarat.
Kini maoy hinungdan nga giunhan sa militar ang pagbomba sa kampo sa BIFF gamit ang 105 MM Howitzers cannon.
Miabag sab ang duha ka MG-520 attack helicopter gikan sa Philippine Air Force hinungdan sa pag-atras sa mga kaaway subay sa Kulasi River paingon sa Liguasan Marsh.
Hangtud karon dili pa matino ang ihap sa mga samaron ug nangamatay sa grupo ni Maliba nga gitumbok sab nga druglord nga naga-suplay og shabu sa probinsiya sa Sultan Kudarat, Maguindanao ug Tacurong City.
Nasayran nga si Maliba, kanhi sakop sa 108th Base Command sa Moro Islamic Liberation Front (MILF) apan karon miyembro na sa BIFF.
Uban sa grupo Maliba ang ilang lider nga si Kumander Sheik Sukarno sa MILF nga kanhing tuong kamot ni Kumander Umbra Kato.