MAS lingaw karong tuiga ang Chinese New Year celebration sa siyudad sa Davao gumikan sa mga dugang pasundayag nga giandam sa Chinatown Development Council.
Kini ang gibutyag ni Jasper Huang, public relation officer sa Chinatown Development Council sa Davao City, human nahan-ay ang mga plano nga mas paninduton pa ang Chinese-themed food stalls atol sa countdown program sa Rizal Park, Pebrero 15.
Usa sa mga highlights mao ang Chinese lion ug dragon dances nga ubanan sa pagpanghatag og mga 'Tikoy' ang usa sa mga popular nga espesyal nga pagkaon atol sa Chinese New Year.
Giingon ni Huang nga ang mga pasundayag sa maong adlaw salmutan sa mga estudyante sa Chinese schools.
Giawhag sa kadagkoan sa programa ang pipila nga magsab-it og mga Chinese lanters ug uban pang mga Chinese symbols gawas sa ilang mga establisyemento aron mas mapabati gayud sa kaugalingon ang selebrasyon.
Alas 5:30 sa hapon magsugod ang countdown nga idungan kini sa usa ka kasaulogan sa Misa sa San Pedro Cathedral diin ang seremonya magsugod alas 6:30 sa gabii ug matapos ang pag-welcome sa Chinese New Year alas 12 sa tungang gabii sa samang adlaw.
Si Davao City Mayor Sara Duterte-Carpio ug uban pa nga opisyal sa dakbayan ang gilauman nga mga halandong bisita atol sa kasaulogan.