HELLOOOOO!!! Hastang dalia ra sa panahon kay bulan na karon sa Pebrero! Musta namo, sis ug bro?
Sunod semana, "Valentines Day" na! Higayon nga gipanghinaman sa mga lovers (manag-uyab, gamay sa mga mag-asawa apil kebetchky (kabit god) ug ang mga uwagon, higala) ha ha!
Bitaw, ang Valentine's Day ang gitawag usab nga Saint Valentine's Day o ang Fiesta ni Saint Valentine, usa ka tinuig nga holiday nga gisaulog sa Pebrero 14. Nagsugod isip usa ka adlaw sa kasaulogan sa kasadpan nga nagpasidungog sa usa o labaw pa nga mga santos nga unang ginganlan nga Valentinus.
Ang Valentine's Day giila karon isip usa ka importante nga kultural, relihiyoso, ug komersiyal nga selebrasyon sa romansa sa daghang mga rehiyon sa tibuok kalibutan, bisan dili kini usa ka pampublikong holiday sa bisan unsang nasud.
Anyway, human na ta'g lakbit sa history tungod sa Valentine's Day apan ang sentro niini ang atong "heart" kon kasingkasing, beshy. Kumusta na ang atong kasingkasing, mga darling? Hisgutan nato ang tulo ka aspeto niini. Una ang pisikal, ikaduha ang emosyonal ug kinaulahiang bahin, ang espirituwal.
Ang atong pisikal nga kasingkasing nag-atubang og dakung hagit tungod ra pod sa atong mga binuhatan sama sa sobrang habhab og pagkaong taas sa kolesterol apil na ang nagkadaiyang bisyo sama sa inom ug panigarilyo, ug ang kulang sa ehersisyo. Taas na baya ang ihap sa mga nangamatay tungod sa ilang dughang giatay este heart nga nangaluya tungod sa dili maayong kondisyon, higala. Amping amping pod ta dala likay sa humba.
Sa kasingkasing nga nag-uros-uros sa gugma, malipayon kini emotionally kung anaa sa hustong edad ug lugar, beshy. Nakadungog na mo anang wala pay dise otso pa na gusto na magminyo- simbako palayo sa nag-inusarang anak nako! Ang uban pod nagpanilap (tulo-laway) gayud ang gibati sa asawa sa ilang silingan, kumpare o higala mao nagsalimuang sila. Gugmang makabuang, gugmang maka-stress daw kini matud pa sa kanta, mare, mao kung makaya - likayan nato kini. sa naigo na. hala, undanga samtang wala pa nangabungkag ang matag-pamilya kay alaut ang mga bata.
Sa espirituwal nga bahin, bulahan kadtong adunay malinawong kasingkasing. Adunay katagbawan sa kinabuhi bisan walay mga kabtangan nga daghan o bisan dili adunahan. Ang Ebanghelyo ni Mateo 6:21 nagkanayong, "Kay diin ang imong bahandi - tua pod ang imong kasingkasing. Gipatin-aw ni Hesus sa maong bersikulo ang importansiya sa pagtipig sa bahandi dito sa langit kaysa dinhi sa yuta. Nagtumong kini sa pagbuhat og kaayohan sa atong isig-kaingon dinhi sa kalibutan kay sa adlaw nga manguli na kita'g langit, ang atong mga paghago aron makauban ang uban sa kalangitan tagaan og dakung ganti sa atong Diyos Amahan.
Ang pagpangabudlay sa pag-angkon og mga nindot nga sakyanan, balay, bisti o uban pang kabtangan- walay bili atubangan sa Diyos apan ang matag kaayohan nga gipadangat nato sa atong kaigsuonan- makapahimaya ug makalipay NIYA. Wala poy masina, magpatay o mag-away inig magtinabangay ta. Apan sa mga paghago aron madatu unya sa dautang pamaagi- adunay silot nga mahiaguman, mare.
Si Haring Solomon sa pagsuwat niya sa Ecclesiastes nga libro nagkanayon, "Everything is meaningless. A chasing after the wind." Wala daw bili ang tanan niyang bahandi ug pagpaningkamot kay ang tinuod nga katagbawan anaa ra sa presensiya ug pagtuman sa kabubut-on sa langitnong Amahan.
Kumusta ang atong heart, mga higala? Angay seguro kitang mamalandong kung ang atong heart anaa sa maayong pisikal, emosyonal ug esprituwal nga kondisyon. #advancehappyvalentines!