SECTIONS
Monday, June 24, 2019

Sugilanon: Bitin nga tapayan

Felixberto A. Esclamado, Jr.
Saac II, Mactan, Lapu-Lapu City, Cebu

NAUPSAN na sa iyang pailob si Pekto. Nagpangagot ang iyang mga ngipon sa tumang kalagot. Tiaw mo bay siyam na ka buok manok niyang binuhi ang nangawala. Dako siyag pagtuo nga gikawat kini sa mga kiriwan. Nagplano siya nga ihawon kadto sa adlawng natawhan sa iyang kamanghurang anak nga motangkod nag tulo ka tuig nianang mosunod nga semana.

Gibaid ni Pekto ang iyang sundang nga gitupsan na sa taya. Naumol sa iyang hunahuna ang panimawos.

Nianang sayong gabii mikatkat si Pekto sa tumoy sa kahoyng kaymito nga dinha sa luyo sa ilang payag nga ginama sa sinalirap nga kawayan ug giaptan og kugon. Mag-uuma si Pekto ug ang iyang asawa nga si Esing. Gigasahan sila sa Ginuo og tulo ka anak nga pulos lalake. Pinangga nila ang ilang mga anak.

“Bantay ka lang nako, buanga ka!” matod ni Pekto nga naminti sa kasuko samtang naghunahuna sa kawatan. “Dili ka santuhon ning akong sundang nga bag-ong binaid.” Didto na siya sa tumoy sa punoan sa kaymito nga namungingi sa daghang bunga.

Daghang kahoy ang naglibot sa payag ni Pekto. Giabot siya og kaduka nga nagpaabot sa kawatan hangtod miabot ang alas dose sa tungang gabii. May dala siyang plaslayit.

Unya nakurat siya sa iyang nakita sa sanga sa kaymito nga diha duol sa iyang nahimutangan. Usa ka dakong bitin ang iyang nakita nga mibilikis sa dakong sanga sa kaymito. Nangurog siya, Daw di siya makatuo kay ang bitin dunay tapay sa iyang ulo. Nakita ni Pekto ang usa sa iyang mga manok igtatari, hapit na matulon sa baba sa bitin nga tapayan.

Wa siya magmugna og kasikas aron di siya makit-an sa bitin. Wa siya mokibo bisan gamay hangtod nga mipadailos siya ngadto sa ubos sa kaymito. Ug mikaratil siya pagdagan.

“Maot kaayo ug ngil-ad ang dagway sa bitin. Ang ulo morag ulo sa dragon. Mao kini ang mitukob sa akong mga binuhing mga manok,” matod ni Pekto sa iyang kaugalingon.

Ang bitin nga tapayan mao ang matang sa bitin nga magdala og trabungko sumala sa asoy sa iyang Tatay Bentong niadtong gamay pa siya. Matod sa iyang amahan, wagas nga bulawan ang trabungko ug hayag kaayo ang silaw niini sama sa dagitab. Maadunahan ang tawo nga makabaton niini kay mahalin og minilyon bisan unsa kagamay ang trabungko. Apan makuha lamang kini kon mamatay na ang biting tapayan. Kon buhi pa kini, lutuson gyud ang tawo nga mangahas pagkawat niini.

Paghiabot ni Pekto sa ilang payag gipukaw dayon niya si Esing ug ang ilang mga anak aron mamiya sila sa dapit nga ila karong gipuy-an, kay basig sila na sab ang tukbon sa bitin inigkahurot sa mga manok. (Katapusan)
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph