PINTOK nga gibutyag ni Pangulong Rodrigo Duterte ang total ban deployment sa mga Pinoy nga nanarbaho sa nasud Kuwait human sa sagunsong dunay nangamatay nga mga overseas Filipino workers (OFW).
Kini ang gibutyag sa Pangulo sa iyang pamulong sa Matina Enclaves sa Davao City, Biyernes
sa gabii.
Sumala sa Pangulo nga iyaha nang gimandoan ang Department of Labor and Employment, Department of Foreign Affairs, Overseas Workers Welfare Administration ug bisan ang Bureau of Immigration ug bisan ang embahada sa Pilipinas sa nasud Kuwait nga ipahunong na ang pagpagawas sa mga Pinoy padung Kuwait ug matigayon ang total ban deployment pauli sa Pinas.
Dugang sa Pangulo nga iyang pakig-istoryahan ang Philippine Airlines (PAL) ug ang Cebu Pacific nga maoy mahimong opisyal nga sakyan sa mga OFW pauli sa Pilipinas.
Migula ang hukom sa Pangulo human sa sunod-sunod nga kamatayon sa pito ka mga OFW diin ang kaso giingong naghikog ug giabuso sa ilang mga employer hinungdan sa ilang kamatayon.
Ning bag-o lang sab, misamot ang kasuko sa Presidente human usa ka Pinay nga taga Iloilo City ang gisulod sa freezer sa iyang giingong kapuyo nga Lebanese sa nasud Kuwait.
Karong bulan sa Marso, molupad unta ang Pangulo sa nasud Kuwait aron molagda sa Memorandum of Understanding (MOU) alang sa seguridad sa mga trabahante sa maong nasud, apan di mosugot ang Kuwaiti government nga mahitabo kini.
Ang Presidente nagbutyag nga haum ang iyang hukom sa total ban deployment sa mga OFW ug di na siya gusto nga duna pay makutloan og kinabuhi nga mga Pilipino sa Kuwait.
Sa bahin ni Dole Secretary Silvestre Bello, tin-aw ang mando sa Pangulo ug kinahanglan kining ipatuman.
Si Bello nagbutyag nga bisan duna nay mga certificate of employment ang mga Pinoy nga gustong mobalik sa nasud Kuwait, di na mahinayon ang ilang paglarga subay sa kamandoan sa Presidente.
Hinuon mipasalig ang Dole ug bisan ang OWWA nga mohatag sila og mga livelihood program ngadto sa mga OFW nga gikan sa maong nasud.
Mokabat 600 tawsan ka mga OFW nga gilangkuban sa mga skilled workers, domestic helpers, ug mga health workers ang naa sa nasud Kuwait ning mga panahona.