Dagiti maryusep...agtutuondan!

Agtutuon, agsisipol, agsasarumbinit kada agkakawil ken agggaburen dagiti kasal-itan a mapaspasamak ditoy pagilian. Suma-total...nagabsuonen dagiti MARYUSEP! Tunggal adda mapasamak a di umannurot iti nalinteg ken nadalus a garaw ken serbisyo iti kagimongan...maibalikastayo ti maryusep!

No adda saan a nakappapati ken makarimon nga aramid a rumbeng a mabinor ken masolusyonan...mayebkasmo latta ti maryusep! Dayta a balikas ket kasiping ti unget, banat, sidir ken pananghusga iti killo nga aramid. Ket ita a panawen...naming-anon a nayebkas dayta a balikas: maryusep! Intay ngarud araduen ken sagadan dagita nga eksena- bato-bato sa langit wenno iti Iluyko: KAYOKAYO!

-o0o-

Iti likud dagiti sangsanguen ti DOH wenno Department of Health nangruna iti isyu ti Dengvaxia...limsot met laeng iti panangarisit ti Commission on Appointment kas sekretaryo ti salun-at ni Sec. Francisco Duque III. Kuna ni Sen. Gringo Honasan, Chairman ti CA Health Committee nga adda talekda iti integridad ken kadagiti plano ni Duque para iti agdama ken masakbayan no salun-at ti saritaan. Simmuporta met kenkuana da Senadores Manny Pacquiao, Miguel Zubiri, JV Ejercito ken Ralph Recto. Malagip a maikaduan a termino ni Duque kas Sekretaryo ti DOH. Ti immuna ket idi panawen ni sigud a presidente Gloria Arroyo. Ni Duque ket inapointaran ni Pres. Duterte kas Health Secretary idi kallabes a tawen kalpasan a saan a nakumpirma ti CA ni sigud a DOH Sec. Paulyn Ubial. Arasaas: ‘bag laketdin ta awan pay ni Duque idi dimteng ditoy pagilian ti Dengvaxia vaccine. Ngem no panawenna ti ibebettak ti kontrobersiya...susmayusep, impusipos a nakalusot iti CA.

-o0o-

Itay nabiit, kas inkari ni Pres. Duterte...inawaten dagiti kameng ti PNP (dagitay babbaro a simrek) ti doblado a sueldoda. Naingato met ti sueldo dagiti immunan a simrek. Natural, dakkel daytoy a puonanda tapno sayaatenda pay ti agsirbisyo iti kagimongan kas inda sinapataan. Ngem SUSMARYUSEP! Dipay pimmudpudot ti talek kadakuada babaen iti doblado a sueldo...addan 18 wenno sangapulo a pulis ti nairekomenda a maikkat iti serbisyo (saan laeng nga iti puwestoda) gapu iti nakababain a pasamak. Tallo kadakuada ti PCP – Police Community Precint Commanders. Maryusep! Dagitoy ket nabuko a matmaturog ken agiinum iti oras ti trabahoda babaen iti sorpresa nga inspeksiyon ni NCRPO Director Oscar Albayalde. Napasamak daytoy kadagiti presinto ti PNP sadiay Pasay City ken Muntinlupa. Parbangon idi napasamak ti inspeksiyon a nakabukingan dagitoy. Mismo a ni Precinct Commander Senior Inspector Mark Oyad ti kadua ti tallo a pulisna nga agiinum iti likud ti presinto idi maaktuan ida ni Albayalde. Rason ni Oyad: ag-birthday kano ti maysa kadagiti pulisna. Sus maryusep!

Idiay met Pasay, nabuko met ni Precinct Commander Senior Inspector John Glenn at nakaturog idi datnan ni Dir. Albayalde agraman ti no mano a pulisna. Tsk tsk...natural, nakaunget ti heneral. Inrekomendanan ti pannakaikkat dagiti nabuko manipud serbisyo. He he...amangan ta im-imasenda pay laeng ti nadoble a sueldoda isu a kasta ti napasamak. No ni Pres. Digong ngata ti nakabuko kadakuada...nia ngata ti napasamak? Amangan ta at-atiddog pay ngem bullet train ti tabbaawna. Amangan ta nakabekkel pay ketdi a dina oras. Ammotayo metten no makaunget ni Digong. No ditoy siyudad ti Baguio a napasamak daytoy ket ni Mayor Mauricio Domogan ti nakabuko kadakuada...siyento porsiyento, maisawang manen ni Mayor Maurice ti pagay-ayatna a sakuntip a: “Sal-ot ken duldog!”. Gasem..intedmo la ngaruden ti kayatda a sueldo ken trato...ballidongenda pay laeng ti agserbisyo! No sibibiag daydi lolok, maymaysa laeng ti ammok nga orderna: “sige, ibitinyo ida iti mangga ta satay palsiitan ken pakuton dagita a sinalbag!”. Susmaryusep!

-o0o-

Iti isyu met ti Denggoyxia, este Dengvaxia...agkakawilen apo dagiti pinnabasol ken tinnudo. Ti nakasaksakit, bayat ti diskusyonda (kontra ken pabor) manaynayonan met dagiti maibutbutaktak a natay wenno biktima ti Dengvaxia. Ti angdodna, pards...kasla awan met ti umako iti nagbasolanna. Aglilisida met aminen. Para kano iti pagimbagan ti kaadduan no apay a napasamak ti panagbakuna babaen iti dayta a produkto ti Sanofi. Natural, nagtinnagen iti dinnaruman agsipud ta sinno aya ti nagannak ti saan a makaunget wenno agpungtot iti napasamak iti anakda gapu laeng iti dayta a bakuna? Susmaryusep, kunada ngarud: maisubliyo kadi pay ti biag dagiti annakmi a biktima ti Dengvaxia a kasla nagay-ayaman dagiti sinalbag nga akin-aramid? No koma ta legal ken natanang a naimbag dayta a programa ti bakuna...saan a nagresulta iti kimat ken gurruod iti agdama. Impir-ak ngarud dagiti maseknan a nagannak: “kasanon no amin a nabakunaan ket agbalin met a biktima kas kadagiti pimmusay nga annakmi. Agpatingga la kadin iti tinnudo ken puros imbestigasyon ti mapasamak? Kaanunto pay a makaawatkami iti hustisya? Gapu kadi ta ngangato ti saad dagiti maitudtudo nga adda nagkuranganda ket maitantan wenno magaburan ti saning-i dagiti piman a biktima?” Daplis: no mapaneknekan a nagbasolda, mapatawan koma ida iti kadagsenan a pannusa. Awan kapet-kapet wenno padr-ipadreno! Ngem no awan madusa...susmaryusep dakdakes ti mapasamak!

-o0o-

Itay nabiit, babaen iti pammilin ni Pres. Duterte...masapul a mapison wenno mabuldozer (in short, rumeken) dagiti sportscar nga illegal a naiserrek ditoy pagilian nga adda idiay Kustom. Kas pammilin, awan ti santuenda uray sinno pay ti akinkukua kadagita a lugan. Adu ti nagamad: apay a marumek dagitoy agkakangina nga sportscar. Saan ngata a maymayat kano no maisubasta ta isu pay ti mapastrek a kuarta ti gobyerno? Sungbat met dagiti nasasaririt: amangan ta maibulsa laeng ti pirak, maymayat laengen a rumken dagita nga illegal a lugan. Adda lohikana, saan aya? Agamaken ti kaadduan iti isyu ti kakurakutan. Adu ngaminen a kakurakutan ti napaspasamak ditoy pagilian. Awanen ti talek ti kaadduan no pirak ti saritaan. Ala, intay suroten ti eksena-pison kontra sportscar. ‘Niat napasamak? Pudno nga inda kano pinison. Rinumekda dagiti smuggled sport cars. Ngem adda immarasaas a dimmaplis: apay a dagiti laeng kano segunda mano a luxury cars ti rinumekda? Saan kano a nairaman a napison ken nabuldozer dagiti agkakangina nga sport cars a kas koma Ferrari, Lamborghini ken Mclaren? Ti kambio ni Bureau of Customs Commissioner Isidro Lapena: “adda proseso kano ti Customs kung ania kadagiti smuggled a lugan ti rumbeng ken saan a rumbeng a marumek.” Susmaryusep! Kunami la no awan santuenda, imbusisi dagiti nakasaksi. Iti bennegmi....urayentayo amangan ta adda pay Part 2 ti pinnisonan. Urayentayo pay dagiti sumaganad nga eksena base iti programada iti nakuna a kontrobersiya. Haayy biag...adu pay dagiti pasamak a timpuakan ti sennaay a susmaryusep, kailian. Ngem agkurkurangtayon iti espasyo. No dikay napnek...ibalikasmo laengen pards ti susmayusep! Adios mi amor, ciao, mabalos!
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph