GITUDLO sa usa ka witness sa kaso sa kamatayon ni Ermita Barangay Kapitan Felecisimo “Imok” Rupinta nga si Cebu City Mayor Tomas Osmeña maoy nagsugo nga ipapatay ang kapitan.
Base sa supplemental affidavit sa usa sa witness nga si Rolando Alvares Pacres, 41, niadtong Pebrero 9, nisaysay kini nga si Osmeña ang giingon nga naghatag kang Winefredo “Wine” Miro sa P200,000 isip bayad sa pagpatay kang Rupinta.
Apan si Osmeña nisumbalik sa akusasyon ug niingon maniubra kini sa pulitika.
"It's (Michael) Dino and SM I suspect are behind this. They just want to put me under preventive suspension so (Vice Mayor) Labella (can) take over the council and complete the stealing of the SRP (South Road Properties).." text message ni Osmeña sa Superbalita Cebu.
"Why would I kill someone who wants to join BOPK," paghulagway ni Osmena kang Imok.
Unang nihatag sa iyang judicial affidavit si Pacres niadtong Disyembre 8, 2017 apan wala niini gisulti kinsa ang “boss” tungod kay nahadlok kini kaniadto dihang gisukit-sukit sa kapulisan alang sa iyang affidavit.
“Sa Pagsugod pa lang, ako nahadlok na nga mosaysay sa tibuok kamatuoran kon si kinsa man ang tawo nga iyang giingon nga iyang BOSS,” tipik sa supplemetal affidavit.
Didto na nga giingong gitug-an na ni Miro nga si Osmeña mao ang iyang boss.
“Ang-ang og kinsa Lan, ‘di gud ko tawo ni Rama, nahibalo naka og kinsa’y atbang ni Rama, si Osmeña,” dugang ni Pacres sa supplemental affidavit niini nga nakuha sa Superbalita Cebu kagahapon.
Nasayran nga P200,000 ang giingon nga bayad alang sa gunman nga makapatay kang Rupinta. (Dugang ni PAC)