Mongaya: Tomas ug Digong

NAGKINAHANGLAN nga mag-survey kining mga oposisyon dinhi sa Syudad sa Sugbo kay daw wala sila makasagop nganong makaayo kang Mayor Tomas Osmeña kining pag-isag mga isyu nga mapareho hinuon siya kang Presidente Rodrigo Duterte.

Gilubag ug giduso ang punto nga si Mayor Osmeña maoy mastermind sa pagpatay ni anhing Barangay Kapitan Imok Rupinta.

Di man katuohan nga pat­yon ni Tomas ang usa ka o­­­pis­yal sa barangay nga wala modagan pagka mayor. Apan, mas katuohan pa kon moingon nga gipatay kay nalambigit sa gidiling drugas.

Sama man gud ni Presidente Duterte, nailado sab kini si Mayor Osmeña nga nagpaluyo sa vigilantes kaniadto.

Gani, mohatag man kini siya og ganti sa mga pulis nga makapatay og mga drug personalities sama kang Jaguar ug Yawa.

Si Yawa ni­tubo pagmaayo diha sa barangay Ermita panahon ni Kap Imok ug kanhi mayor Mike Rama.

Sama kang Presidente Du­terte nga layo ra sa mga gipasangil batok kaniya, walay pruweba nga naglambigit kang Mayor Osmeña sa ka­matayon ni Imok.

Apan ang oposisyon padayong namasangil kanila kabahin niining mga pagpatay og mga tawo nga nalambigit sa gidiling drugas.

Makapahimuot kay ang li­der sa PDP-Laban as Syudad sa Sugbo nga si Bise Mayor Labella wala mailhi nga makusganong nangampanya batok sa gidiling drugas.

Pederalismo

Abi gyud nako og mohilom na si Konsehal Pastor “Jun” Alcover sa pagbatok sa mga adbokasiya ni Presidente Duterte kay kaalyado baya siya ni Bise Mayor Edgar Labella nga mao nay lider sa PDP Laban dinhi sa Syudad sa Sugbo.

Apan nibuhi kini og mga pulong sa miaging adlaw batok sa pederalismo supak makusganong giduso karon ni Presidente Duterte.

Samtang nakahibawo na man kita sa baruganan ni Mayor Osmeña batok sa Imperial Manila, wala pa kitay nadunggan gikan kang Bise Mayor Labella kabahin sa pagduso niining mga adbokasiya sa administrasyon.

Atong matandi man gud ang mga bag-ong sakop sa PDP-Laban sa lalawigan nga makusganong nangampanya na kabahin sa pederalismo.

Apan ang presidente sa PDP-Laban sa Syudad sa Sugbo wala mangusog niini.

Akong giisa kining maong mga pangutana sa Maghisgot Kitag Politika Bay sa Facebook apan igo man lang ko nga gitubag sa iyang mga dumadapig nga pasensya.

Makapahimuot kay alang kanako, kanang magsigig ingon og pasensya aron di ma­higot sa mga klarong baru­ganan og mga isyu murag ki­­naiyang “teka-teka” ni Mar Roxas sa miaging katuigan.

Mao nga nakaingon gyud ko nga kinahanglang mag-survey kining mga propagandist sa oposisyon kay daw yabag ang ilang propaganda.

(@anol_cebu sa Twitter)