NATAPOS sa mga kawani sa upat ka mga barangay sa Dakbayan sa Sugbo ang unang bahin sa ilang pagbansaybansay kung unsaon pagtubag sa emerhensyang tawag sa publiko nga mogamit sa libreng mobile emergency app nga Guardian.
Nasangkapan na sab sa gikinahanglang mga computers nga kinargahan sa programang Guardian ug naka-online na sa cloud server niini, andam na ang barangay Apas, Santo Niño, Poblacion Pardo and Tisa nga motubag sa mga magpakitabang nga mogamit sa Guardian.
Nalusad pipila ka adlaw sa wala pa ang Sinulog 2018, nasulayan na sa software developer SugboTek ang Guardian nga libre na sa’ng ma-download ni bisan kinsa sa matag Android mobile phone gikan sa Google Play.
Wala pa apan mosunod na sab unya ang AppStore alang sa mga iPhones.
Mibansay ang mga inhenyero sa SugboTek sa mga call center ug dispatch operator sa upat ka mga barangay barangay nga misalmot sa pilot execution sa maong mobile app.
Pinili sila sa ilang masigka-kapitan nga momaneho sa ilang tagsa-tagsa ka emergency command center. Lakip sa ilang training ang mga pamaagi ug protocol nga gigamit sa 911 Emergency sa Estados Unidos.
“Mahinungdanon nga nakigbahin ang mga kawani sa talagsaong mga protocol nga iya lang sa Guardian,” miingon si Cloyd Dedicatoria, managing director sa SugboTek nga mimugna sa mobile app sulod na sa upat ka tuig.
Ginamit ang global positioning system, kon GPS, makahibalo ang Guardian operator asa nahimutang ang nanawag gamit ang Google Map, ug makita pa gani ang palibot gamit ang street view sa Google Earth nga makapasayon ug makapapaspas pa sa koordinasyon.
Bisan kung wala’y internet connection o load ba sa mobile data, basta aduna la’y intranet wifi ang dapit sama sa Barangay Apas ug sa usa ka dakbayan sa Metro Cebu, mamahimong ma-access sa mga mogamit ang Guardian.
Gani, magamit ang Guardian panahon o human sa paglabay sa sa katalagman sama sa makusog nga bagyo o’ linog nga makapapukan sa kuryente kay makapahimutang man ang Guardian og mobile transmitter nga may mga generator pa kini ug mga solar panel.
Gitiman-an ni Dedicatoria ni’ng bag-o pa lang ang memorandum of agreement uban nila kapitan Ramil Ayuman sa Apas, Pancho Ramirez sa Santo Niño, Altea Lim sa Poblacion Pardo, ug Phillip Zafra sa Tisa alang sa maong pilot execution.
Mipirma sab si Konsehal Zafra, isip pangulo sa Association of Barangay Councils (ABC), og laing memorandum of understanding diin ang ABC mopa-apil pa sa dugang nga mga barangay kung mapubliko na ang Gaurdian karong tuiga.
Misaksi si Secretary Michael Dino sa pagpirma sa maong mga dokumento ug misaad nga ipakatap ang Guardian “to benefit the poorest of the poor” sa tibuok Kabisay-an, nga ubos sa iyang katungod isip presidential assistant.
Usa ka subsidiary sa ICT systems integrator nga 7Core Communications, usa ka software development company ang Sugbotek nga nakatutok sa open source, machine-to-machine, ug ingon man desktop ug mobile base technology. (PR)