BATA pa lang si Jead Advincula dihang namat-an na niya iyang ginikanan nga maninda og utanon sa Tisa Public Market.
Tungod kay siya ra usa nga anak, nakita niya ang kalisod sa iyang ginikanan hinungdan nga naninguha siya nga mamahimong magmalampuson.
Sa impluwensiya usab sa igsuon sa amahan ni Jead, 28, kinsa nagtrabaho sa maritime industry, naagni siya nga mokuha sa kurso nga Bachelor of Science Marine Transportation.
Giisip niya nga inspirasyon sa pagdasig sa iyang inadlaw-adlaw nga paninguha ang iyang ginikanan “tabangan nato atong parents, mao to akong motivation and inspiration.”
Nigradwar si Jead sa University of Cebu - Mambaling Campus sa iyang bachelor’s degree niadtong 2010.
Tungod kay sa maong kurso, tulo ka tuig ang academic samtang usa ka tuig ang on board ship training, nagdawat siya og P1,000 isip training allowance matag buwan.
Dihang nahuman niya iyang kurso ug nakuha iyang lisensiya niadtong 2011, nisuway siya pag-apply sa nagkadaiyang maritime agency sa Sugbo.
Usa sa iyang naaplyan kining field sa yachting industry diin wala siyay alamag tungod kay kasagaran sa trabaho sa maritime sa nasod kining cruise ship ug cargo lang.
Sulod lang sa upat ka adlaw, nakuha niya ang job offer ug human ang usa ka semana, nilarga siya sa Singapore diin sila manukad sa ilang paglawig sa yate.
Didto nagsugod iyang kasinatian sa Superyacht industry nga nilungtad og pito ka tuig.
Tuig 2013 dihang na-meet niya iyang asawa karon nga si Mich kinsa usa usab sa iyang business partner.
Tungod usab kay nakita ni Jead ang kakuwang sa training hilabi na sa yacht industry ug nahatagan siya og kahigayonan nga makabisita sa International Yacht Training Worldwide sa Canada, nitanyag siya nga motukod og training center alang sa maong industriya sa nasod.
Hunyo 2017, dihang naablihan sa Sugbo ang labing una nga training center nga gitawag nila nga Superyacht Academy in Asia and the Pacific (SAAP).
Sa pagkakaron usa na ka Junior captain si Jead ug siya usab mao ang CEO/President sa SAAP.
Gusto ni Jead nga mapaambit ang iyang kasinatian sa yachting industry diin doble ug triple sa kasamtangan sa sweldo sa cargo ug cruise ship sa maritime industry.