KAPULISAN sa dakbayan sa Talisay nawagtangan nag paglaum nga bulontaryong motahan sa iyang kaugalingon ang inahan isip prime suspek sa pagpatay ni S/Sgt. Mark Herbert Oberes.
Si Oberes kinsa gilubong na niadtong Dominggo giingong gipatay ug gisunog uban sa iyang sakyanan.
Samtang ang suspek nga gipasakaan nag kaso murder mao sila si Resamie Cabañog, 20, taga Isla Verde; Corazon Village 2, Barangay San Isidro, dakbayan sa Talisay, ang laing mga suspek mao ang inahan ni Resamie nga si Edna Cabañog, hinugkud ang panuigon; Tomas Isugan alyas Tommy nga lumad nga taga Magsaysay, Guihulngan Negros Oriental; Joshua Garciano, 22, taga Barangay Tungkil, lungsod sa Minglanilla ug laing duha ka lalaki nga wala pa ilhi.
Si Supt. Marlu Conag, pangulo sa kapulisan sa dakbayan sa Talisay nibutyag nga sa pagkakaron kuwang na silag pagtuo nga mo-surrender ang inahan nga si Edna kinsa nagtagotago pa sa pagkakaron.
Matod ni Cunag nga una niini nakadawat sila'g report nga motahan ang inahan, apan sa gidaguayon na wala na silay pagtuo nga motahan pa kini sa kapulisan aron luwason ang iyang anak.
Siya nagkanayon nga posibling gidawat na lang sa inahan nga ang iyang anak maoy mapriso ug siyamagtagotago.
Sa pagkakaron, ang kapulisan sa Talisay nagpaabot sa kopya sa warrant of arrest nga ipagawas sa korte batok ni Edna ug sa laing tulo ka mga suspek nga giingong atoa na sa Guihulngan Negros Oriental nagtagotago.
Kagahapon ang mga ginikanan sa usa sa mga suspek ng si Joshua Garciano miadto sa Police Station tungod kay aduna silay gustong kuhaon nga mga dukomento sulod sa sakyanan sa ilang anak nga usa sa ebedensiya ug anaa karon sa police station. (DRT)