KABANAY sa sundawo nga gipatay ug gisunog diha sa iyang sakyanan ang nanawagan ngadto ni Presidente Rodrigo Duterte nga kahatagan og pagtagad ang maong kaso.
Pinaagi sa “letter of supplication” nga gipadala ngadto sa buhatan ni Secretary Michael Dino, Presidential Assistant for the Visayas, ilabi nga na-atol sab kagahapon ang pagduaw sa presidente sa Sugbo.
“I and the rest of my brother-in-law’s kin are calling for a fair, impartial and speedy disposition of the case,” tipik sa maong suwat nga pinirmahan sa bayaw ni Air Force SSg. Mark Herbert Oberes nga si Bert Padilla.
Panghinaot sab sa kabanay nga ka-abagan sila niining ilang panawagan nga makab-ot ang hustisya sa niluog nga kamatayon ni Oberes niadtong Enero 31, 2018.
Kini ilabi na nga pabiling gawasnon kadtong upat pa ka mga suspek sa pagpatay sa maong sundawo lakip ni Edna Cabañog nga gitudlong mastermind sa maong krimen.
“To our beloved President, manghinaot unta ko nga mahatagan ug justice ang kamatayon ni Mark kay dili makatarunganon,” tipik sa pamahayag sa biyuda nga si Diane Oberes.
Atol niining pagsuwat gipaabot ang tubag gikan sa OPAV may labot sa maong hangyo.
Ang biktima gilubong niadtong Dominggo sa lungsod sa MInglanilla nga gihatagan og 21-gun salute sa mga sakop sa Philippine Air Force.
Si Oberes, 37, ang gipusil ug gidauban diha sud sa iyang sakyanan sa barangay Valencia, Carcar City.
Gikataho nga ang krimen nahitabo sa Talisay City, Cebu sa dihang giingong midu-aw kini sa panimalay ni Resamie Cabañog, anak ni Edna ug kanhi hinigugma sa biktima.
Gitabangan og kulata sa tulo ka gi-hire nga mga lalake ni Edna ang sundawo, dayon pusil niini ug gidala ang biktima sa Carcar City luwan sa gipanag-iya nga sakyanan ni Oberes ug gida-uban.
Sila si Resamie ug Joshua Garciano ang dali nga nasikop samtang nakaeskapo sila si Edna lakip na kadtong gi-hire nga mga lalake paingon sa lalawigan sa Negro Oriental. (FVQ)