MOHATAG og P50 milyones matag buwan si Presidente Rodrigo Duterte isip dugang ayuda sa Malasakit Center sa Vicente Sotto Memorial Medical Center.
Apan wala pa matino kon asa nga ahensiya ipaagi ang pundo, sumala ni Department of Health 7 Director Jaime Bernadas.
Unom ka mga tambalanan sa Central Visayas ang butangan og Malasakit Center, upat sa Sugbo ug duha sa Bohol, sumala ni Office of the Presidential Assistant for the Visayas Michael Lloyd Dino.
Sa Sugbo, ang mga ospital mao ang VSMMC ug St. Anthony Mother and Child Hospital sa siyudad sa Sugbo; Eversley Child’s Sanitarium and General Hospital, dakbayan sa Mandaue; ug Talisay District Hospital, siyudad sa Talisay.
Samtang sa Bohol, ang Governor Celestino Gallares Memorial Hospital ug Don Emilio Del Valle Memorial Hospital.
Si Duterte namulong ang Malasakit kay dunay impact sa mga tawo sa Sugbo ug sa Visayas.
Matod niya usa kini kaestorya nga dunay malasakit sa mga tawo.
Si Dino niingon nga pinaagi sa Malasakit Center, ipaduol ang serbisyo sa gobiyerno ngadto sa mga tawo pinaagi sa pagpasayon sa paghatag og tabang pinansiyal ngadto sa kabos nga mga pasyente.
Usa kini ka sentro diin gihiusa ang lainlaing mga ahensiya sa gobiyerno sama sa DOH, Department of Social Welfare and Development, Philippine Charity Sweepstakes Office, Philippine Amusement and Gaming Corporation ug Philippine Health Insurance Corporation.
Matod ni PCSO General Manager Alexander Balutan nga matag adlaw duna silay P700,000 nga medical assistance ug mahimo kini nila pausbawan ngadto sa P1 milyon alang sa Sugbo ug kasikbit nga mga lugar.
Suma pa niini nga labing dako P50,000 ang tabang pinansiyal nga ilang mahatag sa usa ka pasyente.
Kon mosobra sa maong kantidad, kinahanglan na sila mangayo og pagtugot sa board sa PCSO sa kaulohan, mag-agad usab sa sakit nga gihambin sa pasyente.
Si Dino nibutyag nga sukad gisugdan ang Malasakit, dul-an na sa 2,000 ka mga pasyente ang natabangan.
Ang presidente ang nangu pagbukas sa Malasakit Center ug nisaksi sa turnover sa 25 gikan sa 1,000 ka computer units alang sa mga tinun-an sa Grade 4, 5, ug 6 sa mga publikong tunghaan sa lagyong mga lugar gikan sa mga business process outsourcing companies.
Kini nga programa ubos sa Tech2Teach nga programa sa OPAV.
Nisaksi usab si Duterte sa pagdawat sa Cebu City Police Office sa radio system gikan sa OPAV nga naglangkob sa usa ka unit sa Trunking Repeater, lima ka units sa Digital Mobile Base Terminal ug 20 ka units sa Digital Portable Terminal.