KON dunay tawo nga mitabang sa nangayo og tabang, di ba ang sukli niini mao ang pagpasalamat.
Sa ato pa, maayo ang gihimo ni Atty. Mark Tolentino, ang Capitol provincial administrator.
Para nako, igo lang mitubag si Tolentino, sa hangyo sa mga molupyo sa Saint Michael Village sa problema sa drainage.
Gihatagan lang og malisya sa mga tawo nga wa makauyon ni Mark ang pagtabang aron hingpit nga masulbad ang problema sa pagbaha.
Ang nahitabo nasulbad na ang problema sa pagbaha ug nangalipay ang mga lumolupyo.
Natayming lang sab nga anaa nagpuyo sa maong subdivision si Tolentino ug maoy presidente sa homeowners association.
Ug anaa magtrabaho sa gobiyerno isip provincial administrator sa Kapitolyo mao nga sayon ang paghimo og isyu.
Di man sab tingali maapeki niini si Tolentino kay dunay pagtugot ang paggamit sa culvert nga dina magamit sa Kapitolyo basi sa lagda sa Commission on Audit (COA).
Ang basura na nga culvert sa Balili property sa Kapitolyo didto sa Naga City maoy gigamit pagpalambo sa drainage problem sa subdivision.
Kon ang mga trabahante sa Kapitolyo ang nagtrabaho gawas naman sa ilang office hour ug ang nagbayad sa pagtrabaho gikan man ang kuwarta sa homeowners.
Kon atong ibutang didto sa laing subdivision gihatag ang drainage wa tingali kisaw kon saba nga mahitabo.
Ug di man sab tingali magdumili sa paghatag og tabang si Tolentino kon dunay moduol ngadto kaniya.
Kay ang katuyoan sa Kapitolyo mao man ang pagtabang ni bisan kinsa nga way gipili.
Kay di man lang ang mga pobre maoy sentro sa pagtabang kon di ang tanan.
Dalaygon sab ang gihimo ni Tolentino, kay iyang giangkon. Nagpasabot lang nga way malisya ang iyang gihimong pagtabang.
(efrenlonzon94@gmail.com/Text:09427930111)