Migallen: Sakto na kaha sa timpla ang Cavaliers?

WA pa man tuoy kasiguroan kon mao na ba gyud ni ang perpektong kombinasyon sa Cleveland Cavaliers, apan ang tanan direksyon atoa mahipunting sa positibong aspeto human mipakita og saktong labok ang ilang mga bag-ong nakuha nga mga batan-ong piyesa.

Gitumbok mao kini silang Fil-Am Jordan Clarkson, Larry Nance Jr. nga gikan sa Los Angeles Lakers, Rodney Hood kanhi sa Utah Jazz ug George Hill kanhi sa Sacramento Kings nga bisan pa man sa ilang unang adlaw sa Cavaliers nakatampo og dako sa dihang ilang gilubong ang Boston Celtics, 121-99, niadtong Dominggo (Lunes dinhi sa Pilipinas).

Ang pagpakigbatok sa Celtics mahimong maoy saktong sukod sa bag-ong Cavaliers tungod kay kini gung Boston maoy pinakamaayong modepensa sa NBA sa karon nga season apan bisan pa niini, wa sila kapugong sa Cavaliers kay gani gani ang tibuok fourth quarter boring na kaayo duwa.

Pero sa gikaingon ko na sa unahan, di pa gyud nato masiguro kay kinsay nasayod nga nagpa-goryo-goryo lang sab ning Boston nga mopakita sa ilang saktong katakos ug sa samang higayon nagpaniid lang una.

Apan usa lang sab ang akong naobserbahan nga ang upat nga gipangpuli sa unom ka sagad mga edad-edaran na mga sinaligan Cavaliers mas dako o bintaha kay gawas nga mga batan-on pulos usab kini agresibo sa ilang opensa.

Si Hood mas defensive player kay sa beteranong si Dwyane Wade. Si Clarkson nga dili kaayo inila sa depensa pero mas maayo pa mobantay kay ni Isaiah Thomas. Si Nance Jr. mas mahulagway nga defensive player kung itandi ni Channing Frye samtang si George Hill pila ka upilo-piloon ang abilidad ni Rose kon depensa ang hisgutan.

Hinuon base sa ranking sa NBA, ang Celtics ubos kaayo sa opensa kay gani anaa kini sa ikanapulo gikan sa kinaubsan. Mao nga ang usa sa tinud-anay nga sukod kon unsa ka epektibo ang depensa sa Cavs uban ning upat nila ka mga bag-ong piyesa mao ang ilang duwa karong adlawa batok sa Oklahoma City Thunder, ang nalakip sa Top 12 sa opensa.

Pero tungod sa ilang kabatan-on, natural nagkinahanglan sila og giya sa beterano ug kini maoy tahas ni LeBron James kinsa makapahuway na unya og gamay sa iyang pagkayod.

Lig-ong ug potential tan-awon nga si James palibutan og mga dekalidad nga mga batan-on pero it remains to be seen gihapon kon unsa kini ka epektibo kay kini magdepende sa ilang relasyon.

Kon dili gihapon gani ni mosaler ngadto sa ngadto hayan ang deperensiya anaa na sa coach kinsa gihugonhugonan nga posibling mailisan. Apan kon nindot gani ang dagan natural masalbar si coach Tyrone Lue sa iyang puwesto. (junmigs0622@yahoo.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph