Law office ni Villarante sa Tabunok gilungkab

GILUNGKAB ang law office ni kanhi Bise Mayor Romeo Villarante nga nakabase sa barangay Tabunok, dakbayan sa Talisay gilung­kab, vault giguba sa mga ka­watan, samtang ang tupad nga lending firm giapil sa pag-lungkab.

Kini maoy ika-11 na sa kaso sa pagpanglungkab sa dakbayan sa Talisay kini wala pay labot sa wala ma-report ngadto sa kapulisan gikan sa Enero 1 ning tuiga hangtod na kagahapong adlawa.

Gumikan niini ang hepe sa kapulisan sa Talisay naalarma na sa maong sunod-sunod nga pagpangkalungkab, hinuon ni­adtong Lunes sa gabii usa ka suspek sa pagpanglungkab ang nasikop sa mga tanod.

Sigun sa report nga kagahapon sa buntag sa dihang miduty na ang mga kawani sa Atty. Romeo Villarante and Jose Lindo Belarmino nga nahimutang sa Alfafara Building, sa barangay Tabunok ilang namatikdan nga abli na ang ilang roll-up door sa ubos nga bahin.

Samtang sa ilang pagsaka abli na usab ang ilang pultahan ug didto ilang nakita nga nagkatag na ang mga butang ug mga dukomento.

Gawas pa giguba na ang vault ug wala na ang usa ka laptop, hinuon gitataw ni Villarante nga 15 mil pesos ra ang suod sa vault kay butangan man gayod kini sa ilang mga importanting dukomento u gang ilang kita sa maong adlaw ideritso man pagdeposito sa bangko.

Gani makita nga nasamad ang naglungkab tungod kay nagkadugo man ang vault ug ubang papelis.

Gilungkab usab ang Sheena Lending Firm sa tupad nga bahin ug nakuha ang kuwarta nga kapin sa P3 mil.

Gumikan niini, nanawagan si Villarante sa mga opisyal sa Talisay ug kapulisan nga hatagan og pagtagad ang grabeng pagsiaw sa lungkab diha sa Talisay nga wala nay pili bisan asa nalang mahitabo.

Sanglit niadtong Dominggo gilungkab usab ang law firm ni Atty. Margarito Egoña.

Nasayran nga base sa record sa kapulisan moabot na og 11 ka mga kaso sa pagpang­lungkab gikan sa buwan sa Enero ning tuiga hangtod ka­gahapon. (DRT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph