LAIN na usab nga reklamo ang atong nadawat gikan sa mga piniriso sa CPDRC. Ug ato kining hatagan og tingog.
“Super Bob, ania na usab kami nga mga piniriso nipadangat sa among kasagmuyo sa nagpadayon dili maayong binuhatan sa ubang trabahante diri sa CPDRC ug Capitol. Kining maong problema mao ra ni nga scenario sa among reklamo sa niaging tuig. Kabahin kini sa dili nila pag-transfer sa mga convicted prisoner bisan aduna nay mittinus order nga gi-issue ang korte.
Sa niagi namong reklamo, ilaha dayon gi aksiyonan, transfer dayon sa Munti ug tangtang dayon ang OIC nga si Macato human mogawas sa imong lindog. Kining duha ka convicted prisoners nga ilaha na pod nga gitagu-an diri mao sila si Joavan Fernandez ug Jeffrey Blanco. Among duda dili lang ni corruption maoy nagpaluyo aning tanan apil na ini ang pulitika. Aber unsa man kuno ilaha rason nga ilaha ni gipugngan?
Kining duha puros mani iligalista diri sa sulod. Sa niaging tuig, nakabati gyud mi diri sa sulod nga gitawag naning duha kay naapil sa line-up para Muntinglupa. Apan pag-abot sa petsa sa actual nga pag-transfer, wala man maapil. Dili man nila mahimong i-rason nga aduna pay mga gi-atubang pending nga mga kaso kining duha maong wala nila gipadala.
Daghan god nang abogado ang Kapitolyo. Apan ngano man gusto pa ba sila nga pahatagan namo sa kopya sa memorandum circular gikan mismo sa OCA sa Korte Suprema? Nga klaro nga nagmando nga as long as adunay nay mittimus nga gi-issue ang usa ka lower court, regardless og naa pay pending nga kaso sa ubang sala, dapat i-transfer na sa Munti? Kami dili nalang mi magpaabot nga adunay pay tarong aksiyon ang Kapitolyo sa among problema diri kay unsaon nga puros mana ilaha mga tawo nga maoy utok sa binuang diha. Sama ana ilaha record officer diha nga si Ruiz taga amoa sa Argao kon tarong pana siya dili unta ni magbalik-balik problemaha. Tawo man kuno ni siya anang Atty. Tolentino mao ning bisan makasala ug kapila pa na siya diri magtago ug kombiktado dili gyud matandog.’ (bobbygnalzaro@gmail.com)