WALA kitay gahom sa pagsanta sa higanteng lihok sa kinaiyahan. Apan, ang tawo gisangkapan sa Makagagahom og pangutok aron makapangandam ug malikay o dili ba kaha, kaminosan ang epekto sa kinabuhi, kabtangan ug pananom. Ang kaandam usa sa mga maayong mithi nga sagupon sa bisan usang pagpaningkamot sa atong pagpakabuhi ning kalibotan.
Hinuon, daghan na ang nakaamgo sa naasoy nga mithi ug nahimo gipahan-ay sa organisadong katilingban hinungdan nga namugna ang National Disaster Risk Reduction and Management Council (NDRRMC), diin ang pagpangandam maoy nag-unang gitutokan gawas sa pagtubag sa mga emerhensiya ug rehabilitasyon human sa usa ka katalagman.
Niadtong Lunes, ang Sugbo usa sa mga lalawigan nga gikusokuso ni Basyang, ang ikaduhang bagyo nga nisulod sa nasod. Ug kaluoy sa Ginoo, usa lang ang natalang patay ug 300 ka mga pamilya ang namakwit. Walay dakong kadaut sa kabtangan ug agrikultura.
Sa kinatibuk-an, ang mga lalawigan nga naagian ni Basyang sa Mindanao ug Kabisay-an, niabot og 5,000 ka pamilya ang namakwit sa 102 evacuation centers, sumala ni NDRRMC spokesperson Mina Marasigan. sumala sa Philippine Coast Guard, nikabat og 4,642 ka pasahero ang stranded, 931 rolling cargoes, 119 passenger vessels ug 9 ka motor bancas ang gisuspenso ang biyahe atol sa Bagyo. Nikabat og 114 ka mga balay ang naguba.
Si Basyang kaduha niigo sa yuta o landfall sa Cortes, Surigao del Sur ug dakbayan sa Dumaguete.
Ang atong kasinatian sa miaging bagyong Basyang maigon nato nga ehemplo tungod sa pagpangandam human minos ang epekto sa kinabuhi. Salamat sa NDRRMC.
Ang pagpangadam maayong mithi nga masagop nato bisan sa personal nga kinabuhi o pamilya alang sa pagharong sa mga hagit sa kinabuhi nga sagad moabot luyo sa atong kasayoran.