3 ka opisyal giimbestigar

ANG Commission on Audit nimando kang Cebu Provincial Administrator Mark Tolentino sa pagpasabot nganong di siya pasakaan og kaso sa paggamit sa mater­yal nga iya sa Kapitolyo gikan sa kontrobersyal nga Balili property ug nidonar niini alang sa drainage project sa private subdivision diin siya nagpuyo.

Gawas kang Tolentino, gimandoan usab sa pagpasabot sila si Provincial General Services Officer Jone Sigfried Sepe ug acting Provincial Accountant Ramon Dumayac.

Sa iyang mando, si COA Audit Team Leader Lolita Mercedes niingon nga sila si Tolentino, Sepe ug Dumayac kinahanglang mopresentar og mga dokumento nga magma­tuod nga ang transaksyon tali sa Lalawigan ug subdivision diin si Tolentino nagpuyo legal.

“Further, we would like to seek your comment why this transaction cannot be considered a violation of any prohibited transactions under Republic Act 3019 or the Anti-Graft and Corrupt Practices Act,” dugang ni Mercedes.

Nasuko

Human masayod si Gobernador Hilario Davide III sa mando sa COA, iyang gimandoan ang tulo sa pagpasabot.

Nasuko si Davide kang Tolentino tungod ini nga isyu.

Sukad nibuto ang isyu sa miaging semana, kagahapon lang nagkita og balik silang Davide ug Tolentino.

Nabalita sa miaging semana ang “private mission” nga giingong gipahimo ni Tolentino sa pipila ka mga job-order employee sa Kapitolyo.

Ang iyang gipa-trabaho mao ang drainage project sa usa ka pribadong subdivision, diin siya nagpuyo dinhi sa siyudad sa Sugbo, gamit ang mga culvert nga iya sa Probinsiya.

Si Davide, nga bag-o lang nabalik gikan sa nagkadaiyang opisyal nga lakaw sa Korea ingon man ang pagpakigtigom kang Pres. Rodrigo Duterte niadtong Martes pa lang nakahigayon pagpakig-estorya sa provincial administrator.

Sa iyang regular press briefing, gipadayag sa gobernador nga nasuko siya sa gihimo ni Tolentino.

Matod niya, wa lang gani kini nagpahibawo kaniya labot sa planong pag-gamit sa mga culvert nga iya sa Kapitolyo.

Personal nang gipaabot ni Davide ngadto kang Tolentino ang iyang kahiubos.

Una nang miingon ang PGSO nga mga waste materials ang mga culvert nga gi-donar ug wa na gikinahanglan ang deed of donation alang niini human nilapas na og 10 ka tuig ang life span niini.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph