Nalzaro: Naay hospital apan walay tambal

MAKADAGHAN na kita ma­kadungog nga daghang mga pasyente sa mga publikong hospital ang nangamatay gumikan kay wala dayon ma-atiman sa mga doktor. Kay walay doktor ang hospital labi pa didto sa mga district hospitals. Naa tuoy doktor apan walay tambal nga ikahatag nga libre ngadto sa mga pasyente. Naay ubang mga medical personnel, mga arogante pa kaayo. Tan-aw nilang pobre ang pasyente, singkahan ug pangasab-an lang. Aduna usay mga kaso sa medical malpractice. Sipyat ang doktor paghatag og tambal ngadto sa pasyente.

Karong bag-o niay laing kaso nga nahitabo sa Minglanilla District Hospital. Usa ka inahan nga si Jessie Bariquit mi-alegar nga namatay ang iyang usa ka tuig nga anak nga si Mary Jane gumikan kay wala dayon ma-atiman sa doktor nga naka-duty sa maong hospital niadtong higayona human magsuka-suka og diarrhea ang iyang anak. Giresitahan matod pa sila og tambal apan wala mapalit kay kulang ang ilang kuwarta. Sa dihang miduol sila og balik sa doktor nga misulti nga wala sila makapalit sa girisita nga tambal kay kulang ang ilang kuwarta, gi-ingnan lang sila sa doktor nga papaulion. Pagkasalbahis sa maong doktor kon tinuod man gani kining alegasyon sa inahan. Mga alas 10 sa gabii gidala ang bata sa tambalanan niadtong Sabado, pagka-alas dose sa tungang gabii, namatay ang bata.

Walay medisina?

Nganong nahitabo man kini? Naa kitay district hospital, naay doktor apan waay tambal. Mag-unsa man nang hospital kon walay ikahatag ngadto sa tambal ngadto sa mga pasyente nga dili maka-afford sa pagpalit og tambal. Mas importante ang tambal kay mao kana ang makapa-ayo sa sakit sa pasyente. Asa naman diay ang pundo alang sa pagpalit og medisina? Wala nay pundo?

Mao gyud unta kini ang hatagan og igong pagtagad sa atong kagamhanan aron mapalig-on og mapalambo ang ope­rasyon sa mga public hospitals sa tumong nga maka-serbisyo gyud sa panginahanglan sa katawhan.

District hospital

Asa naman diay ang gipanghambog ni Gov. Junjun Davide nga maayo na ang operasyon sa atong mga district hospitals? Maayo ba diay nang walay tambal nga ikahatag ngadto sa mga pobreng pas­yente? Iyang gihagit ang iyang kaatbang nga si Atty. Winston Garcia sa pagbisita sa mga district hospitals sa dihang gisaway siya gumikan sa dili maayong pagdumala sa mga district hospitals. Karon tinuod gyud ang akusasyon ni Winston. Unya palabyon lang ni ni Junjun ang maong kaso og wala siyay himoon? Pagka-way hinungdan. (bobby@sunstar.com.ph)