GISAULOG karong adlawa, Enero 16, ang Chinese New Year. Sa atong mga higala nga mga Insik, Kung hei fat choi! Pero nasud lang ang Chinese New Year sa Lent kon kuwaresma nga nagsugod sa Ash Wednesday kon Miyerkoles sa Badlis. Di ba panahon karon sa pagpuasa sa pagkaon og karne?
Apan dunay maayong balita alang sa tanang mga Katoliko nga Sugbuanon, labi niadtong mga Insik. Nihatag si Cebu Archbishop Jose Palma og dispensation gikan sa pag-pagpuasa sa pagkaon og karne karong adlawa.
Ang mga Katoliko nga nagpangedaron gikan sa 14 ngadto sa 60 anyos magpuasa sa pagkaon og karne sa tanang Biyernes sud sa kuwaresma lakip sa Miyerkoles sa Badlis ug Biyernes Santo. Pero exempted and mga Katoliko sa Sugbo karong adlawa. Padayon ang kumbira sa Chinese New Year.
u25cf ● ●
Matod pa ni Archbishop Palma ang dispensation gihatag sa mga obispo sa Pilipinas isip pakigsandurot ug pakighiusa sa mga Katoliko nga Filipino-Chinese nga gustong magsaulog sa Chinese New Year. Gani, gideklarar man nga piyesta opisyal karong adlawa.
Apan nipahinumdom siya nga samtang makakaon kita og karne karong adlawa, kinahanglan nga bugtian kini og maayong mga binuhatan. “If able, please practice good works, such as giving alms to the poor,” matod pa ni Palma.
Usa ra ba sa tradisyon sa mga Insik mao ang pangpanghatag og “ang pow,” kanang puwa nga sobre nga dunay sud nga kuwarta. Hayan nga daghan ang makadawat sa maong sobre karong adlawa.
u25cf ● ●
Sumala pa sa Chinese lunar calendar, ang 2018 mao ang Year of the Earth Dog. Ang iro, ika-onse nga mananap sa Chinese zodiac, simbolo sa pagkamaunungon ug pagkamatinud-anon ingon man sa pagkamahigalaon. Lakip sa mga inilang tawo nga nahimugso sa Year of the Dog sila si Mother Theresa nga gideklarar nga usa ka santos, si kanhi US President Bill Clinton, Michael Jackson, Alec Baldwin ug Justin Bieber.
Ang iro, bisag daghan nag napaakan ug ang uban nabuang na ug dunay rabies, gitawag lang gihapon nga “man’s best friend.” Kay matod pa ang iro makig-unong sa iyang amo sa kaharuhay ug kalisod ug bisan pa gani hangtod sa lubnganan.
Dihay tiguwang nga naglingkod sa hagdan sa ilang balay. Sa atubangan dunay iro nga naglubog. Sa dihang niagi ang usa ka binatilyo, nangutana kini, “Noy, di mamaak imong iro.” Tubag sa tawo, “Dili.” Apan pag-agi gyud sa binatilyo, gipaak dayon sa iro mao nga niingon siya, “Noy ingon ka di mopaak imong iro. Gipaak man lagi ko.” Matod pas tiguwang, “Di man na akong iro. Ang akong iro di mamaak. Dia sa sud, gihigtan pa gyud.”