GIHULAGWAY ni Cebu City Mayor Tomas Osmeña nga angayan lang manubag ang mga konsehal sa Team Rama nga wa manambong sa sesyon niadtong Oktubre 3, 2017.
Kini human gipatubag ang walo ka mga konsehal sa Office of the Ombudsman-Visayas sa kasong gipasaka sa usa ka Emma Gabutan nga residente sa Brgy. Guadalupe.
Si Gabutan nisang-at sa iyang reklmao ngadto kang Councilors Pastor Alcover Jr., James Anthony Cuenco, Jose Daluz III, Joel Garganera, Raymond Alvin Garcia, Jocelyn Pesqueram Eduardo Rama ug ni ex-officio member Phillip Zafra.
Ang gipasaka niini mao ang mga kalapasan sa konsehales sa Republic Act 7160 kun Local Government Code of 1991 ug kalapasan sa RA 6713 kun Code of Conduct and Ethical Standards for Public Officials and Employees.
Matod ni Osmeña nga pahinumdom ang maong kaso sa mga konsehal sa ilang responsibilidad.
“It’s a reminder of their responsibilities. They’re being paid by the people of Cebu. It’s not a luxury, you have a job to do,” matod sa mayor.
Dugang niya nga angayan lang silotan ang mga konsehal tungod kay wa sila magtrabaho sa ilang responsibilidad.
Malaumon usab kini nga angayan sila nga masilotan, “im just hopeful, because it really should be done.”
Gipangayoan og 10 ka adlaw ang mga konsehal sa pag-file sa ilang counter-affidavit subay sa maong adminstrative case nga gipasaka ni Gabutan.