Compio: Sa kinasingkasing gayud

HASTANG busy-ha sa miaging adlaw sa kadalanan, nagpunsisok ang mga tawo sa mga mall ug bisan sa mga restawran kay lagi Valentines Day, giingong adlaw sa mga kasingkasing.

Milabay sab kos Bankerohan Public Market sa Davao City, hastang pagdasok sa tawo nga namalit og mga buwak, dihay buwak pinungpong ug ang bida sa mga buwak ning panahona maoy ang pinungpong nga rosas.

Paglingkod nako sa usa ka food chain, sweet kaayo akong palibot, dihay mga nagpares-pares nga mag-uyab nga dala ang buwak nga rosas ug balloon kurting kasingkasing.

Pagnaug sab nako sa dyip, naagi ko sa usa ka tunghaan, daghan sab ang mga namaligya og buwak nga rosas, sagad kolor pula.

Nakaingon ko'g, unta Valentine's Day na lang kanunay kay bisan og ingon nga adlaw sa mga kasingkasing matag adlaw kung ipakita ang tiunay nga gugma, pero wala diay napabati og tinuoray, kawang gihapon.

Subay sa Valentine's Day, ang kapulisan sa Davao City Police Office (DCPO) nanghatag og mga rosas sa mga pasahero sa dyip nga nangagi atubangan sa barracks, grabeng pahiyom ni City director Senior Supt. Alexander Tagum uban sa iyang sakop, ug alang nako ang maong eksena usa lamang ka talagsaon, kay presyur man matag adlaw ang kapulisan sa pagpatunhay sa kahapsay ug kalinaw sa siyudad.

Pagsalop sa adlaw, misulod ko sa usa ka restawran ug didto nahinuklogan nako human nako'g panihapon niadtong Miyerkules nga kung duna diay kay kasilag sa usa ka tawo, dayon iya kang duolon, dayon tunolan og buwak, mahupay gayod sa pinakalit nga takna ang dugay nang pagdumot.

Nganong nakasulti ko niini? Tungod sa akong higala nga nakauban nako sa pagpanihapon, kalit siyang gitunolan og buwak sa iyang onse ka tuig nang kaaway, pero nahupay kining tanan pinaagi sa tulo ka rosas, paggakos ug pagpangayo'g pasaylo.

Ani lang god ang kinabuhi sa kalibutan, magpasaylo kita sa mga nakasala kanato, kay kung di kini mahitabo, ngil-ad kaayo nga madala nato kini sa lubnganan.

Walaon nato ang kasilag, aron tunhay kita nga makapadayon sa unahan diha sa pagharong sa mga nagkadaiyang hagit sa kinabuhi.

Himuon nato kini, di lamang sa buhat ug sa pulong, apan sa kinasingkasing gayod. Bulahan kita nga magpasaylo, ug isipon nato nga basin ugma damlag ang atong mga anak magtagbo sa usa ka dalan, mas maayong mahisgutan ta nila nga puno sa kalipay.

Ang gugma kanunay kini nga mipuyo sa kinabuhi, kinahanglan ipaambit kini pinaagi sa pagresto ug pagsalig, di lamang sa relasyon diha sa mag-uyab, lakip na sab sa pamilya ug kahigalaan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph