KON magkasungi na gani ang simbahan ug estado maoy makabahinbahin sa baroganan sa katawhan.
Dili unta mosalga ang simbahan kay naa may separation of church and state. Kaakohan sa estado ang ekonomikanhon, politikanhon ug kulturanhong aspeto samtang sa simbahan ang espiritohanong bulohaton.
Mag-ampo ang kaparian nga matoltolan ang mga opisyal nga makahukom alang sa kaayohan sa katilingban subay sa gimbut-an sa Ginoo. Pangaliya sa kaparian maoy makatukbil sa hunahuna sa mga magbabalaod sa tukmang dalan nga angayng subayon. Lakip nga tan-awon sa mga sulogoon sa Ginoo ang ila sab nga han-ay.
Nauyog ang simbahang katoliko human mikatap ang alegasyon nga dunay mga pari nga nagpaeskuyla og uyab, nakig-date luyo sa kombento, nagmolestiya sa mga minor, dunay kaipon, hinayhayng lampin luyo sa kombento, nanukol og sakristan, mipitik sa garter sa bra sa estudyanting nangompisal, nanghinol og babaye, nangasaba sa pinaangkang inahan nga nagpabunyag, midaog og BMW nga mao ray nagpasiugda sa raffle, wala momisa kay kulto ang namatay, nanukmag og tindera, namusil sa nanguhag mangga, giprotestahan kay estrikto, kusog momadyong, manari og manok ug daghan pang pasangil.
Dunay pipila ka pari nga mitalikod sa ilang bokasyon kay wala makapugong sa gikusĀgon sa ilang tawhanong pagbati.
Maayo pay magminyo kay sa masunog ang kasingkasing sa kaibog, sumala ni Novaliches Bishop Teodoro Bacani sa kasong sexual harrashment sa usa ka dalagita ug nalambigit og laing duha ka babaye mibiya sa pagka-pari.
Si Bishop Crisostomo Yalung mibiya human makabaton og duha ka anak. Mons. Arnel Fuentes Lazarejos midala sa 13 anyos nga babaye sa motel gikasohan og human trafficking.
Sa Plaridel, Bulacan pari nag-ballroom kauban sa babaye nakuhaan og video nga nagsayaw-sayaw atubangan sa altar sa simbahan.
Katolikanhong tradisyon ang vow of celevacy, buot ipasabot nga dili makaminyo ang pari. Ang simbahan maoy ilang kapikas.
Liboan na ka katuigan ang nakalabay sa dihang si Hesukristo nagsugod sa ministeryo, ang pari gitugtan nga magminyo.
Ang unang Santo Papa nga si Saint Peter minyo. Sa milabayng katuigan pundok sa 26 ka babayeng Italiana mitunol og petisyon ni Pope Francis nga nangilaba nga sila nahigugma og pari.
Samtang siyam ka mga Theologians sa Germany misulat sa mga Obispo nga nagsusi kon kinahanglan pa ba ang vow of celevacy.
(csa_1156@yahoo.com/0916-734-5737)