USA ka bana ang mitugpa sa Southern Philippines Medical Center (SPMC) human gidunggab sa iyang asawa kay hubog ug nagmaoy kining miuli sa ilang balay.
Ang insidente nahitabo alas 10:30 sa gabii niadtong Huwebes didto sa Holy Cross, Barangay San Antonio, Agdao District, siyudad sa Davao.
Subay sa logbook sa Trauma Complex sa SPMC, gisaysay sa anak sa biktima nga si Renalyn nga hubog nga miuli ang iyang amahan ug nag-wild.
Sa kalagot sa asawa nga si Merlyn, mikuha kinig kutsilyo dayon gidunggab niya iyang bana nga si Romeo, 45, tumong sa likod ug agtang.
Dihang nagkadugo na ang biktima, ang asawa ra sab niini ug mga anak ang midala sa SPMC alas 11 sa gabii.
Sa kasamtangan, anaa na sa luwas nga kahimtang ang biktima kinsa ang mismong asawa ra sab ang nagbantay niini karon didto sa ospital.