MAPASIGARBUHONG nagpahulagway sa miaging semana sila si Bise Mayor Edgar Labella ug pipila ka sakop sa Barug Team Rama uban kang Presidente Rodrigo Duterte.
Nianang adlawa, napatik sa usa ka mantalaan ang baruganan sa ilang kauban sa Barug Team Rama nga si Konsehal Jun Alcover nga supak sa pederalismo.
Matod ni Konsehal Alcover, ang pederalismo makapalig-on sa mga political warlord ug moresulta mas dakong galastuhan sa kagamhanan.
Bisan og supak ako sa iyang punto, dalaygon ang kalig-on ni Alcover sa iyang pagpadayag og baruganan. Sukwahi sa iyang mga kauban nga igo lang magpahulagway kuyog sa presidente apan nitalaw sa pagpadayag og baruganan kabahin sa pederalismo.
Mas maayo pa kining kalihokan sa mga mayor sa miaging Pebrero 10 diha sa Syudad sa Naga. Lig-on ug lantip silang nipadayag sa ilang pagsuporta sa adbokasiya ni President Duterte.
Atubangan sa mga 5,000 nga mga lider sa barangay diha sa Unang Distrito sa Sugbo, gilusad sa mga opisyal nga bag-o lang nagpasakop sa PDP-Laban ang Cebuano Movement for Federalism kun CemFed.
Gani, uban kanila si Kong. Samsam Gullas ug mga chapter leaders sa CemFed ug ang National Movement for Federalism (NamFed) sa ubang dapit sa Sugbo, Visayas, ug Mindanao.
Nahibulong lang ko nganong ang atat kaayo nga magpasakop sa PDP-Laban dinhi sa Syudad sa Sugbo wala mosuporta sa kampanya alang sa pederalismo.
Sa adlaw nga nia si Presidente Duterte, igo lang silang nagpahulagway. Apan ilang sakop sa Team Rama nga si Konsehal Alcover nanaway hinuon sa pederalismo.
PDP-Laban
Tingale angayan sab plantsahon sa PDP-Laban Cebu City kon si kinsa gyud ang tinuod lider. Si Bise Mayor Edgar Labella ba o si Lorna Bacalla?
Kini si Lorna Bacalla nga taga Mabolo maoy lider sa PDP-Laban sa Syudad sa Sugbo kaniadtong panahon pa sa kampanya ug recognized sa PDP-Laban HQ sa Manila. Ubos kini si Bacalla ug ang maong chapter kang Undersecretary ug PDP-Laban Regional President Noel Felongco.
Wala man kini si Bacalla mailisi. Gani, bag-o lang natudlo si kanhi kapitan Lorenzo Basamot isip vice president sa Cebu City chapter sa PDP-Laban. Ang iyang appointment paper gipetsahan og Pebrero 13, 2018.
Hinuon, di man kini dako nga problema basta magkasinabot lang ang mga lain-laing paksyon sa partido.
Sa akong ubos nga pangagpas, kon buot man ni Bise Mayor Labella nga mahimong alas sa bag-ong mga Duterte supporters sa Syudad sa Sugbo, gikinahanglang mopakitag siyag labok sa kampanya alang sa pederalismo.
Apan di kini niya mabuhat kon naa sab sa iyang kiliran si Konsehal Alcover nga nagbatok sa pederalismo. Mahimo si Labella nga joker, dili alas.
(@anol_cebu sa Twitter)