Bidder wa ka-deliver sa 2 ka mga sea ambulances nga paliton sa Kapitolyo
SA ikatulong higayon, napakyas na usab ang bidder nga nidaog alang sa paliton nga duha ka sea ambulances sa kagamhanan sa lalawigan sa Sugbo.
Si Dr. Rene Catan, pangu sa Provincial Health Office, nibutyag nga angay pamultahon ang bidder (wa nganli samtang wala pa makuhai sa iyang habig) sa kapakyas niini pag-deliver sa gisaad nga adlaw niadtong Pebrero 14, 2018.
Matod niya, magpahigayon na usab og laing bidding alang sa pagpalit og duha ka sea ambulances. Matag usa nagbalor og P3.5 milyones.
“I think he will have to be fined for this kay ang ambulance is key sa atoang service delivery. Now, tungod kay wa siya kahatag ana, unya I’ve been looking for him, calling for him, wa gyud na siya motubag nako, unya nipakita na lang siya one day nga busy sad ko,” sumala ni Catan atol sa forum nga gipasiugdahan sa Provincial Information Office.
Ang bidder unang nisaad nga mahatod ang mga sea ambulance niadtong Disyembre sa miaging tuig, apan nihangyo kini og ekstensyon ngadto sa Enero. Apan wa gihapon kini matuman.
“Tan-aw lang gyud nako gatago-tago na siya... I don’t think he is really capable,” dugang ni Catan.
Sumala niini wala pa mabayri ang bidder diin ang pundo bayad kuhaon sa pundo sa Provincial Disaster Risk Reduction and Management Office kay apil kini sa pagpalit sa duha ka speed boats.
Siya nitug-an nga susama ra ang kompaniya nga gipalitan sa Kapitolyo sa speed boats ang bidder sa sea ambulances.
“Naka-deliver man sila sa speed boats, ang question karon is ma-deliver ba nila," dugang sa doktor. (SCG)