KANHI konsehal sa barangay nga drug pusher nadakpan sa buy-bust operation sa miaging hapon sa Barangay Malabagon, lungsod sa Moalboal.
Si Dexterlito Cagang, 35, minyo, kanhi konsehal sa Barangay Malhiao, lungsod sa Badian, gipusasan nila ni Chief Insp. Jose Rovic Villarin, hepe sa Moalboal, ug mga kauban sa Municipal Drug Enforcement Units sa Moalboal Police Station.
Si Villarin nga nahinabi sa Superbalita Cebu nagkanayon nga human nihinay ang drugas sa Brgy. Tomonoy, Moalboal, nisibaw ang Barangay Malabagon, nga didto ang transaction sa drugas didto sa ilang lungsod.
Tungod niini, nipahigayon silag monitoring pipila ka bulan, pagka-Biyernes sa hapon nakadawat silag impormasyon nga dunay namaligyag drugas sa nahisgutang lugar.
Nipahigayon og buy-bust operation ang kapulisan ug nipalit silag P500 nga balor sa usa ka pakiting shabu, apan nakurat sila human sa transaksiyon, usa ka kanhi konsehal ang ilang nadakpan nga si Cagang.
Nakuha nila sa posisyon ni Cagang ang 4 ka putos sa shabu nga mobalor sa kapin P1,000.
Si Villarin niingon nga si kanhi konsehal Cagang, naminyo kini og taga Malabagon, hinungdan nga didto na kini magpuyo.
Nasuta nila gikan kang Cagang, nga ang shabu nga gipamaligya niini gikumpra niya gikan sa lungsod sa San Fernando.