Karit kenni Digong... Sumursurot latta!

KUNADA...uray kano lissiam ni Karit...no naitani a para kenka...masabatmo latta. Ngem no ni karit ket saan a para kenka...uray sabtem, lissiannaka. Mamatikami iti daydi a pangngarig. Kitaenyo laengen ti kasasaad ni Pres. Duterte iti agdama. Sipud nagtugaw a presidente...saanen a naes-esan kadagiti agsasamusam a karit. Ti banglesna, adda dagiti karit a saan a nakappapati no di ketdi pammadakes laeng. Kayatda laeng a dadaelen ti naganna. Ngem no ti kasunganina ti intay timbangen...apay a kayatda a dadaelen? Saan ngata a nabunga wenno husto ti ar-aramidenna ket adu dagiti saan a makaako iti pannakapadisida? Mabalin, kunada...nga adu dagiti agamak gapu iti tibker ni Digong kontra kadagiti illegal nga aramidda? Iti ababa a pannao...supalpal dagiti rinuker a panggepda. Saggaysaentayo dagiti karit, pards:

***

Idi nagbunga ti ingannuatna nga addang kontra illegal a droga...dimmarup dagiti karit kenni Digong. Pinadakesda ti kinapingetna kontra droga. Nagaramidda iti abot a pakaikursonganna. Pinabasolda kadagiti pammapatay iti kampanya kontra illegal a droga. Insaklanganda iti darum a dimmanonen iti International Criminal Court. Madaman iti panaggiling ti imbestigasyon kas pagayatan dagiti kontra iti programana. Ngem iti benneg ni Digong...sanguenna dagita a karit. Ammona nga awan linabsingna. Ammona ti linteg. Ammona a pammadakes laeng dagita a karit tapno lumukneng daytoy kontra kadagiti illegal nga aramid iti sosyodad. Adu ngamin ti nadalapusna. Awan sinantona uray pay kadagiti am-ammona, gagayyem ken naasideg kenkuana. Manarimaanen dagiti kaso a naisaklang kontra kadakuada. Ditayon aginagan ngem adu kadakuada ti karaman kadagiti higante a sida nga addaan pakainaigan iti illegal a droga. Panangisakit iti masakbayan ti addang ti presidente, adda latta dagiti kontra a saan a makaawat wenno agtukiad a mangawat. Adu dagiti pammadakes ti imbakalda kenni Digong. Ngem nagbuwelta babaen iti panagsubli ti Tokhang babaen iti napabaro nga estilo ken pamkuatan. Awanen ti mapapatay wenno maaresto a ma-tokhang. Makita ita no adda pay mangbabalaw iti nasao nga addang.

***

Kinaritda manen ni Digong panggep iti isyu ti West Phil. Sea. Panpanuynoyan kano ti presidente ti ar-aramiden dagiti Tsino kadagiti terotoryo a sakup ti Pilipinas. Ngem saan a sinumlang ni Duterte dagita nga atap. Inkalinteganna ketdi a masapultayo ti natanang a solusyon a saan a dinadarasudos. Kunana ngarud: saan a kabusor ti China ti Pilipinas no di ketdi ti Estados Unidos. No malagipyo pay ti daplis ni Sec. Roque itay nabiit...a pabor kadatayo dagiti inaramid ti China kadagiti makuna a teritoryotayo. Ngamin, kuna ni Roque...maaramattayto met laeng dagita a pasilidad. No ania ken kasano...ammo ti Malakanyang ti takderda iti dayta a banag. Nalawag ti kalintegan ni Digong – saanna a paboran ti napudot a komprontasyon. Ammona a kuton laeng ti kayarigan ti Pilipinas no armada-militar ti saritaan kontra China. Di rumbeng ti makipinnatangken no awan met laeng ti kabaelantayo a makirinnupak. Ngem saludsodda: saan ngata a tumulong ti Amerika kadatayo kas pangarigan ta gubatennatayo ti Tsina? Adayo a mapasamak ti kasta, kuna met dagiti annalysts. Iti agdama a panawen...awan ti nasyon ti mangayat a mapasamak manen ti maysa pay a gubat. Adun ti adal nga imbunga ti gubat- sangalubongan. Agingga iti agdama, agag-agastayo pay laeng kadagita a lamma ti gubat. Kuna ngarud daydi lolok: kadagiti nagkauna a gubat, buneng ken pika ken pikbong ti naaramat. Ngem ita a panawen...talmeg laengen iti maysa a buton...adun ti marunaw a paset ti lubong. He he...medyo nakaadalsan ni lolok iti nagdur-asan ti teknolohiya. Idi ngamin panawenna...saan a gatilyo ti taltalmeganna no di ketdi puseg ti kaasmangna iti kabaret. Sana pasarunuan iti apput ken puged...umadu manen ti puli, kakang, kalpasan dagiti areng-eng ken rittuok ti tulang ken anit-it ti katre.

***

Itay laeng nabiit... naibutaktak nga insardengen ti Ombudsman ti imbestigasyonda panggep kadagiti naisaklang a darum wenno reklamo panggep iti kinabaknang kano ni Pres. Duterte ken pamilyana. Dayta nga isyu ti saan a pulos nagdiskanso sipud inrugi ni Sen. Trillanes ti nagbusi a kasla wrong speed a machine gun. Adu dagiti imbutaktakna panggep iti kinabaknang kano ni Digong. Atapenna (Trilanes) a nagtaud dagitoy manipud illegal ket rumbeng kano a madusa wenno madistugaw ni Duterte. Ngem nalawag ti imbutaktak ti Solicitor General’s office nga adda gayamen pangeddeng ti Ombudsman a saradon ti nakuna nga isyu kontra kinabaknang ni Digong. Kayatna a sawen..maisardeng metten ti Senate probe panggep iti daytoy. Saludsod: kasanon ni Sen. Trillanes? Kasanona pay laeng nga ipilit a papirmaen ni Digong iti waiver no nalpasen ti kaso? He he...adu dagiti nangegtayo a kantiaw. Ania aya kano ti kayat a mapasamak ni Trillanes ta kasta unay ti gatelna a mapadisi iti akem ni Digong? Kunada ngarud: kas pangarigan, mapukaw ni Digong...ania ti aramiden wenno ania ti akmen ni Trillanes? Isu kadi ti sumublat idiay Malakanyang? Kinapudnona...itay laeng kallabes, babaen iti Davao City Council..nangeddengda iti pannakaideklara a Persona-non-grata kenni Trillanes ken Philantropist a ni Loida Nicolas Lewis. Kayatna a sawen...maparitan dagitoy a makadap-aw idiay Davao City. Natural, ammotayon a sinintir ni Trilanes ti nakuna a pangeddeng. Ania ngata ti sumaruno manen nga addangna kontra Digong? Urayentayo.

***

Gapu kadagiti nagsasaruno a damag iti pannakamalmaltrato dagiti Pilipino nga OFWs idiay Kuwait...nangeddeng ni Pres. Duterte para iti total ban iti deployment sadiay. Nupay saan a nainkapilitan, kinunana a mas naim-imbag no agawid laengen dagiti OFWs tapno mailiklikda iti dakes a mapaspasamak iti nakuna a nasyon. Mailagip a ti kadaksan a pagteng ket ti pannakasarakda iti maysa a Pinay caregiver iti uneg ti maysa a freezer. Addan addang ti gobyerno panggep iti daytoy. Nakasaganan ti maysa a team a mapan Kuwait tapno agimbestigar. Indiaya met ni Digong dagiti mabalin a maitulong ti gobyerno kadagiti OFWs a mapukawan iti panggedan apaman a makasangpetdan ditoy pagilian. Ti kadagsenan a kari ti presidente ket ti kinunana iti maysa a pasken idi sinaksianna ti panagsapata dagiti kabbaro nga appointed officials ti administrasyonna. Ania ti basnotna: “I’m willing to sell my soul to the devil to find money for the OFWs returning from Kuwait!”. Nadagsen a karit.

Katukadna ti naimpussuan a panangisakit kadagiti piman a kailliantayo a maparparigat iti sabali a pagilian. Kuna met dagiti makaawat: no koma ta adda dagiti bastante a panggedan ken umdas a sapul... saanen a kasapulan a panawam pay laeng ti pagiliam nangruna ket agsebsebbaka ken patay iti dayta a sakripisyon a mayadayo iti pamilyam ken kailiam. Ikararagtayo a dinto koman maulit pay ti napasamak idiay Kuwait. Adios mi amor, ciao, mabalos!
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">



style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="4158864647">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph