MOABOT ngadto sa P1.5 milyones ang gigahin sa Cebu City Government alang sa umaabot nga ika-81 nga anibersaryo pagka-siyudad sa dakbayan sa Sugbo.
Ang labing dako nga pahat sa pundo mao ang gastuhon alang sa programa nga Serbisyong Sugbuanon nga ipahigayon karong Pebrero 23 didto sa Plaza Sugbo atubangan sa legislative building sa City Hall.
Atol sa maong adlaw, ang City Government motunol sa ilang mga batakang serbisyo sama sa medical consultations, feeding, ayuda alang sa mga mag-uuma, senior citizens, persons with disability ug showcase sa technical vocational skills training.
Ang Cebu City Government mogasto usab og P256,000 alang sa pagahimuon nga programa karong Pebrero 24 ug ang paghatag og mga token sa mga outstanding institutions ug individuals nga nakatabang sa paglambo sa siyudad.
Ang awarding ceremony ug testimonial dinner ipahigayon didto sa Cebu City Waterfront Hotel and Casino atol sa Charter Day.
Si Bryner Diaz, officer in-charge sa Cultural and Historical Affairs Commission, nagkanayon nga P85,000 ang gitagana alang sa pagkaon sa mga bisita nianang pagkabuntag ug laing P171,000 ang gitagana alang sa plaques sa mga awardess.
Si Cathy Yso, secretary to the mayor, nagkanayon nga sama sa niaging tuig, P1.5 milyones maoy ilang bana-bana nga gasto sa usa sa labing mahinungdanong adlaw sa dakbayan.
Ang City Government mohatag og pasidungog sa upat ka outstanding individuals nga gilangkuban nilang Mary Joy Tabal, gold medalist sa 2017 Southeast Asian Games marathon, Dr. Warfe Engracia, fild director Remton Zuasola ug film actress Chai Fonacier.
Samtang duha ang pasidunggan isip outstanding institution nga mao ang Mabolo Elementary School ug Julie’s Bakeshop.
Si Mayor Tomas Osmeña una nang nibutyag nga di siya gusto og bongga nga selebrasyon sanglit angay nga magdaginot ang City Hall ug di sama sa niaging administrasyon nga nigasto og minilyon sa maong kalihukan.
Kahinumduman nga saulugon sa dakbayan sa Sugbo ang ika-81 nga kasumaran sa pagka-siyudad pinaagi sa Republic Act 7287.
Natawo ang dakbayan sa Sugbo niadtong Pebro 24, 1937 nunot sa Commonwealth Act No. 58 nga sa wa pa kini mahitabo usa siya ka lungsod nga sakop sa lalawigan sa Sugbo ug pinaagi sa balaod nahimo na siya nga "independent Chartered City". (PAC)