TAN-AWA ra gud ning kasamtangang mga opisyal sa Philippine Olympic Committee (POC) nga gipangulohan ni Jose “Peping” Cojuangco, nagpabaga na lang gyud sa ilang nawong.
Wa pa diay kunoy kasiguro-an kon mahinayon ba ang re-election sa POC nga gikatakda karong Pebrero 23 nga maoy gimando sa Pasig Regional Court kinsa mibaliwala sa resulta sa niaging piniliay sa POC niadtong 2016.
Ang spokesperson sa POC nga si Rep. Prospero Pichay mibutyag nga magdepende lang kini kon unsay makab-ot nga desisyon sa general assembly kon ipahigayon ba o dili pa ang eleksiyon sanglit walay hurisdiksiyon ug dili makabuot ang korte sa mga kalihukan sa POC.
“Remember that the court is not in the position to order an election. This is sports. This is a private institution. The IOC is our supreme authority. Between the judge and Frank Elizalde who has more than 35 years of experience in the IOC, I think Mr. Elizalde is in a perfect position to know who is eligible to run and who is not,” matod ni Pichay.
Unya og mao na ang inyong baruganan, nganong niapelar man mo sa korte sa dihang unang gihukman nga dili balido ang inyong pagkapili sa nilabayng eleksiyon human ninyo gipang-disqualify ang inyong mga kontra?
Mipasalig pa gani ning mga tawhana nga andam sila nga motahod kon unsay hukom sa Court of Appeals kalabot sa ilang pag-apelar sa reklamo batok kanila. Apan sa dihang gi-deny ang ilang apelasyon sa kalit lang nausab ang ilang intonada.
Bisan gani ang International Olympic Committee (IOC) wa molaban kanila ug mimando nga mopahigayon og dinaliang general assembly sa dili pa ang gikatakdang piniliay.
Pero bisan pa niini, ang grupong Cojuangco nangita gihapon og technicality aron lang sila magpabilin sa puwesto. Ingon ni Pichay nga wa kuno mo-order ang IOC og election kon dili ang giingon niini mao ang paghusay.
Sa naigi man gud nga POC election, gi-disqualify sa POC sila si Ricky Vargas ug Rep. Abraham Tolentino nga mosakbang nila ni Cojuangco ug Tom Carrasco isip president ug vice-president sa rason nga dili kuno aktibo ang duha sa matag general assembly nga ipahigayon.
Kini maoy nahimong isyu nga naabot sa korte diin napildi ang grupo ni Cojuangco.
Karong adlawa, gikatakda ang general assembly, so atong sundan kon unsa na pud ang sunod ipasangil ning grupo ni Cojuangco.
Nganong mahadlok man sila og dunay reelection kon tinuod man gani nga anaa kanila ang mayoriya sa National Sports Association (NSA). Dili na lang unta gamitan og teknikalidad kon dili respetohan ang konsensiya sa kadaghanan.
Afterall, ang tinud-anay nga mananaog, (ug kon mahinayon man gani ang eleksiyon) mao ra usab ang nasod. Gahi pa man sa kahoyng magkuno kining mga tawhana. (junmigs0622@yahoo.com)