SUKAD Enero hangtod karong buwana, padayon nakadawat ang Provincial Health Office og mga report nga may mga bata nga giingong nagka-dengue human mabakunahi og Dengvaxia.
Sa labing uwahi nga report sa Health Emergency Alert Reporting System (HEARS) sa PHO gikan sa Pebrero 8 ngadto sa 12, 2018, duha ka mga tambalanan nga gidumala sa kagamhanan sa lalawigan sa Sugbo ang nitaho nga may 16 ka gidudahang mga kaso sa dengue, tulo niini ang nagpakonsulta, human mabakunahi og Dengvaxia.
Kasagaran sa nasinati sa mga bata kay gipanghilantan, gipang-ubo, gipanglabdan sa ulo, gipangsakitan sa mga tiyan ug nagsuka.
Ang Ricardo L. Maningo Memorial Hospital sa lungsod sa San Francisco, isla sa Camotes, nitaho nga may usa ka bata ang gi-admit niadtong Pebrero 7, 2018 tungod kay 10 na ka adlaw nga gihilantan. Kini nabakunahan og Dengvaxia.
Sa samang adlaw, unom ka mga bata nga nahatagan usab og Dengvaxia, ang gidala usab sa maong tambalanan kay gipanghilantan sud sa pipila na ka adlaw, gilabdan og ulo, gisakitan og mga tiyan ug gipang-ubo.
Niadtong Pebrero 5, laing bata ang gidala sa RMMH kay tulo ka adlaw na nga gihilantan ug giubo, wala pay labot niini ang nadala sa ospital sukad niadtong Enero 15 hangtod sa Pebrero 2.
Ang Bogo Provincial Hospital nitaho nga may bata usab nga gihilantan sud na sa upat ka adlaw ang na-admit human mabakunahi og Dengvaxia.
Si Dr. Rene Catan, pangu sa PHO, namahayag nga kini nga mga report gikan sa mga tambalanan nga gidumala sa provincial government, wala pay labot ang ubang mga ospital nga gitan-aw sa Department of Health.
Sila gitahasan sa DOH nga mohimo og surveillance sa 162,000 ka mga bata nga nabakunahan og Dengvaxia sa probinsya sa Sugbo.
“Sa pagkakaron, we’re still in the process of surveillance and the surveillance will not end, padayon gyud na siya,” dugang ni Catan.
Matod niya, nagbansay sila sa mga barangay health worker aron maoy mohimo sa surveillance diin magkuha pa sila og lista sa DOH ug municipal health officers sa mga bata nga nabakunahan og Dengvaxia.