LUYO nga wala makatambong si Davao City Mayor Sara Duterte-Carpio, nagmalampuson ang pormal nga pag-abli sa Davao Regional Athletic Association (Davraa) 2018 sa University of Mindanao (UM) Matina Campus kagahapong adlawa, Pebrero 18.
Ang mayor mipaabot og mensahe pinaagi sa pagrepresenta ni Representative Alberto Ungab nga iyang giawhag ang mga atleta nga di lang target modaug sa matag duwa apan mahimong tawo sa katilingban.
"We hope you will make not just to win and improve every game. Ultimate goal of the best athlete is to be better person. Make friends foster camaraderie and enjoy the moment," mensahe sa mayor.
Samtang mitambong sab sila Philippine Sports Commission Chief William Ramirez ug Senador Manny Pacquaio.
Gisulti ni Ramirez nga ang pinaka-kinahanglan sa atleta mao ang "fighting spirit" sama kang kanhi 8-division boxing champion Pacquaio hinungdan sa kalampusan sa iyang karera sa boksing.
Sa bahin ni Pacquaio, iyang gisaysay iyang kinabuhi isip atleta gikan sa kalisud hangtud sa kalampusan.
"To the young athletes, nag-umapaw akong kalipay sa pagtan-aw sa inyong tanan. Nakahinumdom ko sa bata pa ko sa pagkapobre. Sa una baseball ko, kaso naigo man ko sa likod sa first base, nihawa ko, nisulod pod ko og volleyball unya nag-runner. Unya sa boksing kay naa may premyo, lalaban lang may premyo okay na may pambili ng bigas. Sa tinoud lang, di excuse ang kapobrehon. Unsa kalisud ang kinabuhi, di gyud ma-discourage instead didto mokuha og encourage ug determinasyon aron magmalampuson ug mag-ampo
sa Ginoo," suma ni Pacquiao.
Tungod niini, mga atleta misingit ug mipalakpak sa mensahe sa senador.
Dunay 11 ka delegasyon ang magtigi sa torneyo nga maoy kwalipikasyon alang sa Palarong Pambansa 2018 karong Mayo didto sa siyudad Vigan.