HALOS tanang mga sakop sa Gabinete ni Presidente Rodrigo Roa Duterte, lakip ang pipila ka mga bus nga puno sa mga tigsuporta, ang nangadto sa Senado aron sa pagpakita sa ilang suporta kang Secretary to the President kun SAP Bong Go.
Diha sa sulod sa hawanan sa Senado diin gipahigayon ang hearing kabahin sa kontrobersyal nga pagpalit og duha ka mga frigate sa Philippine Navy ang mga sakop sa opisyal nga pamilya sa presidente samtang ang mga yanong tigsuporta diha nagpunsisok sa gawas sa Senado.
Matod pa sa reporter nga nag-cover sa maong kalihokan, halos naabot sa Mall of Asia ang linya sa mga bus nga gisakyan sa mga tigsuporta.
Wa man kita makatuhog dayon sa maong isyu mao nga atong gigahin ang tibuok buntag kagahapon aron lang sa pagtan-aw sa live coverage.
Samtang magtimbang-timbang pa kita kabahin sa mga impormasyon nga nahisgutan, nabalaka lang ako nga nayagyag sa tibuok nasud ang mga confidential nga detalye kabahin sa atong pagpalit og duha ka modernong barko nga panggubat gikan sa South Korea.
Kon wa pa man mahibaw-i sa ubang mga nasud ang kapabilidad sa maong barko, karon daw nahibaw-an na sa tanan.
Pero sigi na lang. Ingon niani man kaha ang proseso sa demokrasya. Mahinungdanon alang kanato nga makahibawo ang publiko aron atong matimbang-timbang kon si kinsay nagsulti sa tinuod ug kinsay namakak.
Niining puntoha, dalaygon ang pag-atubang mismo ni SAP Go sa Senado ug sa publiko.
PDP-Laban
Maayo sab alang kanako kining paglutaw sa paksyon sa PDP-Laban Cebu City nga gipangulohan ni Lorna Bacalla. Nakadungog na ako sa maong ngalan taud-taud na apan karon pa ko masayod dihang gipatik sa laing mantalaan ang middle name ni Bacalla nga Roa.
Paryente man diay kini si Lorna Roa Bacalla kang Presidente Duterte. Buot ipasabot dili masayon-sayon sa pagsiko aron mapapas ang ilang paksyon sa PDP-Laban karong mga kanhi tigsuporta ni Jojo Binay namalhin sa partido ni Digong.
Ang bise presidente sa maong pundok mao si Lorenzo Basamot, kanhi kapitan sa Camputhaw ug kandidato ni Digong alang sa pagka konsehal sa Syudad sa Sugbo.
Nabalita na nga si Bacalla ang gi-recognize sa national HQ sa partido isip lider dinhi sa Syudad. Nagkanayon si Bise Mayor Ed Labella nga kaila sila ni Lorna Bacalla ug sa bana niini nga si Heneral Alexander Bacalla.
Matod sa usa ka sakop sa MRRD diha sa Facebook, ang grupo ni Bacalla ang kaalyado sa Let’s DO (Duterte-Osmeña) It kaniadtong kampanya.
(@anol_cebu sa Twitter)