SUGOD sa bulan sa Enero ngadto bulan sa Pebrero moabot na ngadto sa 42 ka mga illegal gambling operation ang gihimo sa kapulisan sa Police Regional Office (PRO)-Northern Mindanao.
Matud ni Police Superintendent Lemuel Gonda, tigpamaba sa PRO, nga kini mao ang kinatibuk-an nga operasyon sa kapolisan sa rehiyon batok sa small town lottery kon illegal swertres.
Moabot sa 21 ka operasyon gikan sa Bukidnon Provincial Police Office; 11 sa Lanao del Norte PPO; 4 sa Cagayan de Oro; 2 sa Camiguin ug Misamis Occidental; ug usa lamang sa Iligan City Police Office ug Misamis Oriental Provincial Police Office.
Niining operasyon 41 ka mga tao ang nadakpan nga nakuhaan og kwarta nga gikan sa sugal moabot og P24,858.
Gituman lamang sa kapolisan ang direktiba ni Presidente Rodrigo Duterte ug Police Director General Ronald Dela Rosa labot sa gipatumang Operation High Roller diin gikinahanglan ang kapolisan mohimo og usa ka one time big time operation batok illegal gambling sa ilang tagsa tagsa ka mga area of responsibility.
Si PRO regional director Timoteo Pacleb namahayag nga human sa revamp sa buhatan sa PRO usa ka one strike policy ang iyang ipatuman kalabot niining illegal gambling ug palagputon ang opisyal kon dili mohimo sa ilang tahas.