KON dili mohimo og lakang si Gov. Hilario Davide III sa pagdisiplina aning duha ka mga opisyal sa Kapitolyo nga nahilambigit og laing anomaliya, maka-ingon na gyud ko nga pahoy kining maong gobernador. Nahibawo mo og unsa nang pahoy? Kanang tawo-tawo sa humayan nga pang-abog sa mga maya. Puwerting sukoa kuno sa gobernador. Apan kutob lang ba diha?
Si Provincial Administrator Mark Tolentino miangkon nga iyang gi-request aron i-donate ang mga nahibiling culverts o imbornal didto sa Balili Property sa Naga City. Sobra kadto niadtong pagtabon ni kanhi governor ug karon 3rd district Congresswomen Gwen Garcia sa lote nga napalit sa iyang administrasyon nga naglubog sa tubig.
Gigamit ni Tolentino ang maong mga culverts sa St. Michael Subdivision sa Barangay Banilad, Cebu City diin siya magpuyo ug maoy presidente siya sa homeowners association. Nagbuot-buot lang og kuha si Tolentino niini inabagan ni Jone Sigfred Sepe, hepe sa PGSO. Sila lang ang nagsabot-sabot og wala kini makaabot sa gobernador.
Laing ka kumboya nila mao si Nelson Mabugnon nga maoy nagpatrabaho sa mga job order employees atol sa ilang off duty. Apan bisan off duty, gipa-biometrics sila. Bout ipasabot nga nahulog mga overtime. Apan matod pa ni Tolentino nga gibayaran ang mga nagtrabaho sa taga homeowners association. Siguro wala mahatag ang tanan gumikan kay ang maong mga trabahante mao may nangreklamo sa taga media hinungdan nga nabisto kini. Si Mabugnon maoy nagdawat sa kuwarta.
Unya dili ni anomaloso nga walay pagtugot sa gobernador, walay klarong inventory sa Commission on Audit (COA) ug walay resolusyon sa Hunta Probinsiyal?
Unya duphan lang gihapon kini sa gobernador? Kini sila si Tolentino ug Sepe mao gihapon kini sila ang mahilambigit sa kuwestiyonable nga bidding alang sa pagpalit og mga heavy equipment nga gidiskasi sa gobernador kay ang gipadaog mao ang highest bidder. Mga walay uwaw.
(bobbygnalzaro@gmail.com)