SILA si Jayson Salubre ug Hareve Sumatra maoy midomina sa Open ug youth dibisyon sa 21st APM chess tournament niadtong milabay nga Sabado sa managlahing venue sa dakbayan sa Davao.
Mitala og kinatibuk-an si Salubre og 4.5 puntos human sa 5 rounds swiss system sa Agdao Flyover Ground Area aron mabulsa ang premyong P1,500 ug medalya alang sa open dibisyon.
Ikaduha si Harison Maamo mihimo og 4 puntos ug ikatulo si NM Macacuna Macala nga managsama og puntos apan napakyas sa tiebreak aron makadawat og P1,000 ug P500 nga dunay tagsa ka medalya sa maong posisyon.
Samtang sa youth nga gihimo sa Barangay 37 covered court ning dakbayan, mikampeyon si Sumatra nga dunay 5.5 puntos batok Bhing Joel Gimony nga 5 puntos human sa unom ka round.
Nakuha ni Sumatra ang premyong P1,000 ug medalya samtang P500 ug medalya kang Gimony.
Ikatulo si Marc Lawrence Unday nga mitala og 4.5 puntos ug dunay P300 ug medalya.
Wa sab nagpaulahi si Betty Jean Bordios kinsa nakasungkit sa Top Female award ug James Catayas sa Top Under-12 player. (Marizz R. Perez)