3 ka life sentence para sa langyaw tungod sa cybersex

GIPAHAMTANGAN og silot nga tulo ka life sentence ang usa ka Australian national tungod sa pagpadagan ug cybersex den ug pagpangabuso og mga menor de edad sa Barangay Labangon, Cebu City niadtong tuig 2013.

Si Cebu City RTC Branch 20 Judge Marlon Jay Moneva mikombikto ni Drew Frederick Shobbrock sa duha ka kasong qualified trafficking ug laing usa ka kaso sa child pornography.

Gawas kang Shobbrock, gikombikto sab ug gipahamtangan og silot nga life sentence ang akusadong Pinay nga si Leslie Ann Crasco.

Ang korte nakakita og igong ebidensiya pagpamatuod nga nakasala sila si Shobbrock ug Crasco.

Niadtong Abril 17, 2013 dihang nasikop sila sa usa ka raid nga gipahigayon sa National Bureau of Investigation (NBI) 7.

Atol sa operasyon, 15 ka mga babaye ang naluwas, diin upat niini mga menor de edad.

Nakuha atol sa raid ang 7 ka mga laptop, mga computer, computer parts, hard disk nga giingong dunay sulod nga mga law-ay nag mga hulagway, sex toys, duha ka mga armas ug uban pa.

Sa gihimo nga pakisusi, tulo ka mga menor de edad ang niangkon nga gibayran sila sa langyaw paghimo og law-ay nga binuhatan atubangan sa camera o internet, lakip na sa pagpakighilawas.

Sa gihimong operasyon sa NBI, niabag kanila ang International Justice Mission ug ang Inter Agency Council Against Trafficking.

Sa surveillance sa NBI 7 niadtong 2013, nigawas nga ipang-upload diay ni Shobbrock sa internet ang mga law-ay nga hulagway sa mga bata ug mga babaye.

Duna sa’y giingong sexual contact tali sa mga bata nga na-rescue ug sa akusado. Una na nga gipanghimakak sa langyaw ang mga alegasyon.

Nagdumili si Shobbrok ug Crasco pag-komentaryo kalabot sa silot nga gipahamtang sa korte ngadto kanila.

Matod sa ilang abogado nga si Salvador Solima, ilang iapelar ang desisyon sa korte. (AZDL)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph