GIBANHIGAN ug gipatay sa usa ka wa pa mailhing mamumuno si Atty. Jonnah John Ungab, ang bise mayor sa lungsod sa Ronda, sa dayon nang hagtok sa udtong tutok niadtong Lunes didto sa duol sa Qimonda Bldg., ang bag-ong Cebu City Hall of Justice, sa Cebu City north reclamation area.
Gisusi pa sa mga tinugyanan sa balaod kon si kinsa ang mamumuno ug unsa ang iyang motibo sa pagpatay kang Atty. Ungab. Ang pagbanhig nahitabo human siya moatubang sa hukmanan uban sa iyang kliyente, ang self-confessed drug lord nga si Rolando “Kerwin” Espinosa Jr.
Nahitabo ang pagbanhig usa ka adlaw human sa ika-upat ka tuig nga pagbanhig patay ni Atty. Noel Archival didto sa lungsod sa Dalaguete sa habagatang Sugbo. Laing duha ka tawo ang napatay sa maong pagbanhig. Tulo ka mga opisyal sa Highway Patrol Group nga gipasakaan og kasong murder bahin niini wa pa masikop.
Ato kining gihisgotan aron pagklaro sa papel sa mga abogado, mga manlalaban, sa pagpadagan sa atong sistem sa hudikatora. Ang mga abogado giila nga mga “officers of the court,” mga opisyal sa hukmanan. Way bista nga mahitabo kon way abogado nga motunga sa mga korte. Kon way abogado o manlalaban, mohunong pagtuyok ang galingan sa hustisya.
Ang mga abogado igo lang nga manalipod sa ilang mga kliyente subay sa gilatid sa balaod. Sa ato pa, di mahimong ilumpong ang abogado ngadto sa iyang kliyente o sa kawsa sa iyang kliyente. Kay una sa tanan, ang iyang obligasyon mao man ngadto sa hukmanan isip usa ka officer of the court.
Ato sab nga klaruhon pagsabot kadtong linya ni William Shakespeare nga nagkanayon, “Let's kill all the lawyers.” Ang tibuok nga linya mao kini; The first thing we do, let's kill all the lawyers.
Ang nagsulti niini mao si Dick the Butcher sa Henry VI, Part II, Act IV, Scene II, Line 73.
Si Dick the Butcher hinanib sa rebelde nga si Jack Cade, nga nakahunahuna nga kon makatisok siyag kagubot, kon wa nay kahuSay, siya maoy mahimong hari.
Sa panan-aw ni Dick the Butcher, ang mga abogado maoy simbolo sa kahusay. Busa, kon patyon ang mga abogado, magkagubot ang katilingban ug molampos sila sa ilang giplano nga paglumpag sa gobyerno.
Sa ato pa, ang maong linya gitumong ni Shakespeare sa pagdayeg sa mga abogado nga simbolo sa kahusay sa atong katilingban. Kon mawagtang ang mga abogado, maoy mobanos ang kasamok, kaguliyang ug ang pagkawagtang sa atong mga katungod, ilabi na sa kinabuhi, kagawasan ug kabtangan.
(edbarrita@gmail.com)