Nalzaro: Ungab apil sa drug trade?

GISUSI pa og maayo karon sa kapulisan kon unsa ang motibo sa pagpusil-patay kang Ronda Vice Mayor Jonnah John Ungab. Ang kapulisan mipalutaw sa tulo ka mga anggulo sa pagpamanhig ni Ungab. Una, ang pulitika didto sa Ronda. Ikaduha, personal nga panagbangi, ug ang ikatulo, ang iyang pagpangabogar sa mga high profile nga mga clients nga kasagaran nahilambigit sa illegal nga kalihukan sa drugas.

Siya ang abogado niadtong napatay nga druglord nga si AMayor Rolando Espinosa Sr. sa Albuera, Leyte, ug sa anak niini nga si Kerwin, kinsa gitumbok nga dakong druglord sa Eastern Visayas. Si Ungab usab ang abogado ni Alvaro Alvaro alyas Barok nga kasamtangang napriso sa Cebu Provincial Detention and Rehabilitation Center (CPDRC), ug sa Sugboanong negosyante nga si Kenneth Dong nga nahilambi­git sa P6.5 billion nga shabu smuggling didto sa Manila port.

Mosuway kuno kita pag-analisar niining mga anggulo nga gipalutaw sa kapulisan. Sa pulitika. Morag imposible nga ipapatay si Atty. Ungab sa iyang mga kaatbang. Ang mayor karon sa Ronda nga si Nonnie Blanco iya man nga uyuan. Unya pareho sila og partido. Ang mikontra ni Nonnie niadtong miaging eleksiyon mao ang igsoon ni Atty. Ungab nga si Moymoy. Di pod siguro sila magpatay.

Sa personal nga kinabuhi, wala kitay kalibutan niana. Unsa man, negosyo? Love triangle? Pero sa iyang pagka-abogado morag dako ang posibilidad. Mga high profile ang mga kliyente sa abogado. Apan matod pa ni Insp. Jovie Espenido, ang kanhi hepe sa kapulisan sa Albuera ug karon hepe sa Ozamiz City, nga si Ungab dili lang abogado sa mga Espinosa kon dili apil gyud sa ilang grupo sa illegal nga drugas.

Basi kini sa affidavit sa napatay nga mayor nga gikuha mismo ni Espenido sa dihang didto pa siya sa Albuera. Si Atty. Ungab naa sa administrative side sa operasyon sa mga Espinosa. Siya maoy tigpiyansa sa mga tawo ni Espinosa nga madakpan. Dako ang posibilidad nga mga tawo ra usab sa mga Espinosa ang nagbira kang Ungab. Ngano man nga natayming nga diri si Kerwin aron pagtambong sa iyang promulgation nga gibirahan ang abogado? Di pod kaha biktima si Ungab sa “war on drugs” sa Duterte administration aron paghulga sa mga abogado nga milaban sa mga druglords? Posible baya.

(bobbygnalzaro@gmail.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph