Garcia: Mayap at Marok Panugaling Isik (Good and Bad Chinese Traits)

“Deng sablang taung sasabyan mu
malambat na lang mengalaso kambe ring butul da.
Ding amanu da na mu reng mengatagan.
Ing makiagyung tau titikdo ya karatang ning panaun;
Nung ali ya kanita mapagal yang lilibut-libut na mu nu man karin.
Dindam ku nang dingmangayap a talabaliwas
kukutkut da la ring pibandyan da bang lunto bala ala lang nanu man,
at ing makayangat a tang mipantas na panugali
magsangkan-sangkan ya king kamangmangan.

Isakwil mu la, ginu, ring kekang paratut a angin,
ding dakal mung kaburyan at makapagmulalang kapasyagan.
Ala lang daptan a mayap keka, ginu!
Ita na ngan ing asabi ku keka.”

~ Lao Tzu, Tao Te Ching, Chapter 1:Verse 1

“Mengari king pande pilak balang kimut, ditak-ditak, pena-penandit
Lalabulan na la ring karinatan ning melaso pilak—
antita ya mu naman ing byasang tau, king sarili na.

Mengari king kalawang--karinatan ning bakal—
a mamangan king bakal a nung nu ya misapwak,
anti ta mu naman ding dapat ning ninu man a mabibye mayalingasngas
paynturu da ya king marok a kararasan.”

~ Dhammapada, 8:239-240

***

Kapilan pa pigmasusyan da reng Isik at ding manwala at kakampi karela ing Bayung Banwa agpang king Bulan o ing Bayung Banwa ring Isik—kanu. Lakwas lang mesigla ngeni reng magmasusi kaniti pauli ning dakal na la karing manungkulan ding manwala karing Isik.
Keraklan karing Isik malaram la’t mapamirayit uling ing kapagnasan da mu king bye ya pin ing pagpakasalapi king nanu mang paralan. Nanu mang dake at dane ning gagawan da king bye salapi ing pagnasan dang akwa. Panakitan. Tubu. Tatakut la king lugi o pangulugi anti nung makananu lang tatakut deng matsing keng danum o ing ubingan keng api.

Migising la--salapi. Lumakad la—salapi. Paynawa la—salapi. Mangan la—salapi, ay ali—kakanan da pati tinga da ba’la mung makatipid at e mabawas salapi. Matudtud la—salapi ing isipan da. Inya mekad pati paninap da—salapi mu naman. Kamulagat da king masala o kagising da—kalapan da la ring salapi da.

Simba la man at mangadi ba’la mung dakal a salapi. Tutu lang makalabwad a tau deng Isik. Balu ku kasi maralas kung lalabas karing pisamban da at akakit ku a ing pamanyamba ra ba’la mung lakwas misalapi, nung man e la pa masalapi.

Dakal mu naman kareng Isik ing salawla. Mapaglura la’t mapangangkak nu man karin, inya ata reng kabalen tamu karela la memuling mapaglura at mapangangkak mu naman agyang keng arap-arapan at kabang mamangan.

Neng mamangan ku king Ongpin, dakal ku akakit mamangan a Isik a kakalken do reng balungus da at ipan kabang mamangan la. Kaybat maninga la at ilura da iti king pinggan o basung pipanganan o pinuman da. E la man marine kanita agyang kapurit. Lalaki pati na babai antita.

Makanyan man, deng Isik byasa la king pamamilang, lalu na nung salapi. Masipag la at e la patugut king pamanintunan o pamagbaliwas. Lupa lang malinis balat uling mangaputi la at mangalingatngat la mu naman agyang pati balat siku o intud.

Maingat la king kalusugan at pamikakatawan deng Isik at iti apapagumasdan king karelang gawi king pamaglutu at pamamangan. Deng panulu da keraklan likas la o ibat la king kalikasan inya sa’t dalise la at ala lang marok a talab king katawan deti.

***

Dake Talabaldugan:

1. kudlóng/kudlíng – (palagyu) kudyaping gawa king kwayan. English – bamboo guitar. Alimbawa king pamangamit: “Daig ne pa ning manigtigang kudlung ing malikut a anak a mengaket salusad.”

2. kudyapî – (palagyu) titigtigan da ring pipumpunan. English – ancient native guitar; lyre in modern language. Alimbawa king pamangamit: “King antabe ring apulung kudyapi lakwas yang merandam legwan a siwala ing magdalit a dalagita.”

3. kulanì – (palagyu) kulinyawan. English – swelling of the lymphatic gland; glandular inflammation. Alimbawa king pamangamit: “Neng mayna ya katawan at mikakasakit ya ing tau kanita la lalto deng kulani.”

4. kulang – (panguri) e makagyu, e ganap, e miras, ating bawas. English – insufficient, lacking. Alimbawa king pamangamit: “Mekatapilan da tinimbang ing sasalwan nang mayumung Isang oneng tagana ping kulang.”

5. kulangot/kulangut – (palagyu) dinat a mayayakit kilub ning arung. English – dried mucus in the nose; booger. Alimbawa king pamangamit: “Tararadyin pot pot mete ya i Tsa Bukot, nukarin de libing? King sapang mabaling; nukarin de kutkot? King sapang mabantot!”

***

IRIYANG KAPAMPANGAN: Mekad iriya ya naman ing kalamnan ning dalit ayni o akagisingan da na reng pipumpunan tamu. Mekad mu. Antini ya kasi: “Mumuran, mumuran magkanta la ring asan; lilintik lilintik magkanta la ring Isik!” Mapalyaring magsaya la neng mumuran uling midiligan la reng asikan da o manalangin la bang e la mangulugi nung miyalbugan no man deng inasik dang nanu man. Inya mu kanu mangadi la reng isik ba’la mung manakitan, magtubu at e mangulugi, subali pa keng e la sakit at mipaldan no man kareng nanu mang kapanamdaman dang daralanan. Memuli ta’kaya karela, abe?

***

PAMIPALINO: Ing Kapisik magnasa ya at manwalang misubling pasibayu ing lagablab ning legwan ning Kalinangan Kapampangan kapamilatan ding keyang dalit, kawatasan, amlat at miyayaliwang kapaglalangan a misulat king pigmulan at tune kulitan kambe ning dalise at mapagmasabal a pamisip at parasan. Ing panyulat ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan. Ing Kapisik ala yang kikilingan a kapanaligan, aguman o ninu man nung e ing Lubusang Katutwan.
style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="1977900730">



style="display:block; text-align:center;"
data-ad-layout="in-article"
data-ad-format="fluid"
data-ad-client="ca-pub-2836569479021745"
data-ad-slot="4158864647">


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph