SUBAY niining pagpamusil patay sa Sugbo, nanawagan usab ang kaparian sa Simbahang Katoliko nga mahunong na kini ingon man makuha sa mga biktima ang hustisya sa ilang kamatayon.
Mismo ang team moderator sa Cebu Metropolitan Cebu ug Archdiocesan Spiritual Director sa World Apostolate of Fatima nga si Msgr. Ruben Labajo, nanawagan sa hustisya sa kamatayon ni Ronda Vice Mayor Jonnah John Ungab kinsa gi-ambush patay niadtong Pebrero 19.
Si Labajo nagkanayon nga eye opener kining pagpamatay sa inila nga mga tawo, nga dali na diay ang pagpatay.
“Eye opener kining panahona ron, life has become less valuable. Killing a person who earns a living through his decent profession, tawo nga tarong unya gipatay,” si Labajo nagkanayon.
Ang mga panghitabo napanahon sa himuon nga Walk for Life with Mary karong Sabado, Pebrero 24, diin aduna’y procession gikan sa Fuente Osmeña rotonda paingon sa Cebu Metropolitan Cathedral.
Matod ni Fe Barino, chairman sa Commission on the Laity, nga alas 3:30 sa kaadlawon ang assembly, alas 4 sa kaadlawon nga na hingpit magsugod ang procession ug sundan sa santos nga misa sa Cathedral sa alas 5:30 diin si Cebu Archbishop Jose Palma ang mangulo.
Matod ni Barino nga usa lamang ka carozza ang i-procession diin sakay niini ang imahen sa Our Lady of Guadalupe.
Matod ni Barino nga usa ka timaan ang Walk for Life kon unsa ka bililhon ang kinabuhi.
Mao kini ang labing una nga Walk for Life nga procession sa Sugbo, apan ikaduha na kini sa nasod ug simultaneous sa ubang archdiocese sa nasod.
Adunay ipakatap nga mga personnel ang Cebu City Transportation Office ug matod ni Edilberto Ludovica Jr., sa CTTO, nga ang dan P. Burgos lang atubangan sa Cathedral ang sirhan nga dalan.
Gawas niini, makaagi ra ang mga motorista sa agian sa procession human nga makaagi ang mga tawo.
Samtang ang Cebu City Police Office mopakatap usab og 30 ka security police aron masiguro nga luwas ang mga manambong.
Gilauman nga motambong ang 5,000 ngadto sa10,000 ka mga Katoliko sa maong kalihokan.
Aduna’y kandila ug wristband nga mapalit sa buhatan sa Commission on the Laity nga magamit sa procession.