MIDASIG ang pangulo sa National Police Commission (Napolcom) 7 sa kapulisan nga sa nahitabong pagkamatay ni PO2 Evie Espina atol sa buybust operation nga di maluya apan himuon kini nilang inspirasyon.
Ang Napolcom misaad og full scholarship gikan sa elementary ngadto na sa pagraduwar sa kolihiyo sa upat ka mga nahabiling anak sa namatay.
Samtang gibarugan sa kapulisan sa Minglanilla nga legitimate ang ilang operation ug andam silang moatubang sa bisan unsang imbestigasyon.
Kahinumdoman nakalas ang pulis nga sakop sa Dru Enforcement Unit (DEU) sa Minglanilla Police nga si Espina nga taga dakbayan sa Talisay.
Si Espina namatay human misukol ang buot unta nilang dakpon ang numero uno nga drug personality ug gitumbok nga usa ka high value target sa lungsod sa Minglanilla nga si Jovilio Franza nga molupyo sa Barangay Tulay.
Kagahapon, si Napolcom regional director Homer Cabaral uban sa ilang Public Information Officer nga si Atty. Risty Sibay mibisita sa haya sa pulis.
Samtang ilang personal nga gitunol ang pahasubo ngadto sa pamilya dungan sa pagpahibaw nga ang nahabiling anak ni Espina makapahimulos sa ilang scholarship program sa Napolcom.
Ilang gipasalig nga hangtod na kini sa pagraduwar sa kolihiyo ug kon nagtungha kini sa elementary sa pampublikong eskuylahan ibalhin kini ngadto sa pribado.
Gipaabot usab nga madawat sa asawa ang burial benefits ingon man ang death gratuity nga ang tanan moabot sa 15 ka buwan sa iyang suweldo.
Giklaro ni Cabaral nga ang ilang ihatag iya lang sa NAPOLCOM wala pay labot sa benipisyo nga mahatag unya sa ila mismong organisasyon sa Phil. National Police.
Ang igsuon pulis sa namatay nga si SPO1 Mikie Espina kinsa maoy miatubang sa kadagkuan sa Napolcom miingon nga di na mabalik pa ang kinabuhi sa iyang igsuon.
Apan iyang gipasalamatan ang saad sa Napolcom ngadto sa pamilya sa iyang igsuon.
Samtang si PO3 Gilmer Noval, imbestigador sa Minglanilla Police, miingon nga nagpaabot nalang sila sa resulta sa autopsy ingon man sa ballistic examination sa nakuhang slug sa bala aron itakdo sa nakuhang armas gikan sa suspek nga si Franza.
Matod ni Noval nga ila na unyang ipasaka ang kaso batok sa asawa ug anak sa suspek.
Iyang gibarugan nga lihitimo ang ilang operasyon gani nakig-alayon pa sila sa Philippine Drug Enforcement Agency sa wa pa ang ilang operation.
Kini maoy pagmatuod nga buybust ang ilang tuyo sukwahi sa pasangil sa pamilya nga gidiretso ra silag hamag sa kapulisan.
Hinuon giklaro ni Noval nga katungod usab kini sa pamilya ang pagdangop sa bisan asang ahensya sa gobyerno ilabi na sa Commission on Human Rights apan sila sa kapulisan andam usab moatubang sa bisan asa pa nga imbestigasyon. (DRT)