NAPULO ka mga paroladong piniriso ang nakagawas na sa Misamis Oriental Provincial Jail and Rehabilitation Center (MOPJ) niadtong Lunes ug Martes, Pebrero 19-20.
Gibutyag ni MOPJ Warden Dominador Tagarda nga kining napulo ka priso nakaserbisyo na sa ilang mga salaod nga nahimo sulod sa gikatakdang katuigan.
"Their release is based on the Court Order. Ubos sa pag-abag sa Provincial Legal Office ang maong mga inmates nag-avail sa plea bargaining agreement sa DOJ (Department of Justice), mao nadali ang ilang paglaya. Aron sab maluag-luagan ang atong prisohan,” matud ni Tagarda.
Sa wala pa mamauli, mihapit sila sa buhatan ni Misamis Oriental Governor Yevgeny Vincente Emano diin naghatag kini og tambag sa mga priso.
“Magtinarong na kamo. Dili ko gusto nga makita pa kamo nako sulod sa prisohan tungod kay nalambigit na usab kamo sa illegal nga trabaho. Maglisod na ako ug tabang kaninyo kung madakpan pa kamo pag-usab. Hunahunaon ninyo inyong mga pamilya, inahan, amahan ug mga anak,” tipik sa pahayag ni Emano.
Gipadalhan sab sila og P500 cash assistance alang sa ilang pamasahe ug allowance sa pagkaon.
“Maayo na lang pangpalit sa pancit aron pasalubong sa inyong mga anak ug pamilya,” dugang niini.
Sagad sa mga nakagawas mga nalambigit sa ginadili nga druga nga nagserbisyo og tulo ngadto upat ka tuig.
Matud sab sa mga nakagawas nga priso nga daghan sila natun-an sulod sa prisuhan kon hisgotan ang panginabuhian tungod kay susama lamang daw sa sila nanarbaho. Apan ilang gipasalig nga dili na gayud mobalik sulod niini.